Impakdaar ti Philippine Atmospheric, Geophysical and Astronomical Services Administration (PAGASA) ita nga aldaw, Septiembre 2, a ti Low Pressure Area (LPA) iti daya ti Northern Luzon ken ti abagat (southwest monsoon) ti agtultuloy a mangyeg iti tudo iti entero a pagilian.
Itay 3:00 ti parbangon, nasaripatpatan ti PAGASA ti LPA iti 865 a kilometro iti daya ti Northern Luzon.
Segun iti PAGASA, dagitoy a kasasaad ti panawen ti mangpapigsa iti abagat a mangapektar iti Southern Luzon, Visayas, ken iti amianan a paset ti Mindanao.
Naulep a tangatang a buyogen ti naiwaras a tudo ken bayakabak a patauden ti LPA ti mapasaran iti Cagayan Valley, Central Luzon, Ifugao, ken Benguet.
Retirado a heneral, nakemmeg gapu iti panangsugsog a mangtippuog iti gobierno
Ti met abagat ti mangyeg iti naulep a tangatang ken napigsa a tudo iti Metro Manila, Calabarzon, Mimaropa, Western Visayas, Camarines Norte, ken Camarines Sur.
Dinagadag ti PAGASA dagiti residente ken kadagiti disaster risk reduction and management office (DRRMO) ti ili nga agridam ken agannadda, ta mabalin a mangipaulog ti PAGASA kadagiti Heavy Rainfall Warning ken Thunderstorm Advisories ita nga agmalem (Sept. 2). (Merlina Hernando-Malipot/Manila Bulletin//Lito Hilidon/Bannawag)
