Nangipaay ni Budget Secretary Amenah Pangandaman ti impormasion iti Senate Committee on Finance bayat ti briefing ti Development Budget Coordination Committee maipapan iti singasing a 2026 national budget iti Senado, iti Siudad ti Pasay idi Sept. 1, 2025. Immanamong ni Pangandaman a makikoordinar ken ni Public Works Secretary Vince Dizon iti realignment, kalpasan ti panangigatget ni Senador Panfilo Lacson para iti pannakaisayangkat dagiti executive session tapno maammuan no ania dagiti proyekto a rumbeng nga umawat iti pondo. (PNA photo ni Avito Dalan)

Agtinnulong da Senador Panfilo Lacson ken Senate Committee on Finance chairman Sherwin Gatchalian tapno mai-realiagn iti Department of Budget and Management (DBM) ken Department of Public Works and Highways (DPWH) ti di kumurang a ₱51.82 a bilion ti gatadna a mapagduaduaan a “naisangsangayan” nga insertions iti singasing a 2026 a nailian a badiet.

Inlasin ni Lacson dagiti lump-sum allocation, a dineskribirna a saan a nalawag ken adda labitna a mausar iti di umisu, bayat ti briefing ti Development Budget Coordination Committee (DBCC) ita a Martes, Sept. 2.

Napaliiwna a mairaman kadagiti item ti adu nga entries para iti flood management programs iti Metro Manila ken Region 1 (Ilocos), Region 2 (Cagayan Valley), ken Region 3 (Central Luzon) nga agpapada ti gastosna ngem awanan iti espesipiko a detalye ti proyekto.

"Kayatmi ken Sen. Gatchalian nga ikkaten dagitoy a saan a nalawag nga entry iti NEP (National Expenditure Program). Kas man panggep dagiti nang-insert kadagitoy nga item nga aramiden a ghost projects dagitoy. Saanmi a mabigbig no siasino ti nang-insert kadagitoy," kinuna ni Lacson.

Nasional

Kasapulan ti natibker ken nainkalintegan a pagtaktakderan iti parikut iti WPS --NMC

Kinunana a ti panggep ket maiturong manen ti pondo kadagiti prioridad a programa a maitunos iti Philippine Medium-Term Development Plan.

“No amendarantayo ti budget bill, panggepmi nga i-realign dagitoy nga item... tapno maitunos dagiti pannakamendar iti direksion a kayat a turongen ti gobierno nasional,” innayonna.

Mairaman kadagiti nalasin nga appropriations ti 88 nga item nga aggatad iti ₱150 milion ti tunggal maysa (₱13.2 a bilion), 373 nga item nga aggatad iti ₱100 a milion ti tunggal maysa (₱37.3 a bilion), ken 11 nga item nga aggatad iti ₱120 a milion ti tunggal maysa (₱1.32 a bilion). (Wilnard Bacelonia/PNA)