Indagadag ni Senador Francis “Kiko” Pangilinan idi Lunes, Septiembre 1, ti naan-anay a pannakaipakat ti Anti-Agricultural Economic Sabotage Act a nagkunaanna a ti agtultuloy a saan a pannakaipatungpal iti linteg, dadaelenna ti seguridad iti taraon ti pagilian ken paturedenna dagiti kriminal nga agganansia uray pakaidagelan ti pagilian.

Iti maikadua a hearing ti Senate Committee on Agriculture, Food, and Agrarian Reform a nakairamanan dagiti komite ti Ways and Means ken Finance, inulit ni  Pangilinan ti panawaganna a pasardengenen ti gobierno ti agraraira nga agricultural smuggling iti pagilian ken pagsungbatenna dagiti smuggler ken profiteer babaen ti panangipakat iti linteg.

Segun ken ni Pangilinan, adda pagpadaan ti anomalia kadagiti flood control project iti nabayagen a parikut ti pagilian iti agricultural smuggling.

“Adu ti pagpadaan ti maulit-ulit a layus ditoy Metro Manila ken ti krisis iti taraon. Malaksid a nagramut daytoy iti kurapsion ken kinaawan hustisia, ti layus ken krisis iti taraon ti mangmangted iti kadakkelan a rigat iti gagangay a Filipino,” kinuna ni Pangilinan.  

Nasional

Mapukpukaw a nobia, nasarakan iti Pangasinan

“Ni gagangay a Filipino a dumawdawat laeng iti natalged a kalsada, patas a presio, ken taraon a kabaelan a gatangen,” innayon ti senador.

Imballaagna a no mapalubosan dagiti awan prinsipiona a negosiante ken agipuspuslit iti bagas a mangidiktar iti presio ti taraon babaen ti nasaknap a panangmanipular iti presio, hoarding, profiteering,  ken saan a patas nga aramid iti panagtagilako, agtultuloy ti panagsagaba dagiti Filipino iti nangato a presio dagiti taraon ken agtalinaed dagiti mannalon a maysa kadagiti napanglaw a sektor ti pagilian.

“No layusen dagiti smuggler dagiti merkadotayo kadagiti nalaka, saan a nabuisan, ken taraon a saan a maiparbeng a kanen, saanda laeng a daddadaelen ti pagbiag dagiti mannalon. Sabsabotahienda pay ti seguridad ti pagilian, ib-ibusenda ti pundo ti gobierno, ket ad-adda a madadael ti panagtalek dagiti umili iti estado,” kinunana.

Dinakamat ni Pangilinan ti panaggandat dagiti agipuspuslit a mangiserrek iti aggatad iti P143 milion a produkto ti agrikultura iti Subic port ita laeng a tawen.

Nadakamatna pay nga idi Hulio, sangapulo a container a naideklarar a naglaon iti naproseso a taraon ti naduktalanda a naglaon  iti carrots, puraw a sibuyas, ken frozen a mackerel nga aggatad iti agarup P100 a milion.

Ti gatad, kinuna ni Pangilinan, nangatngato nga amang ngem iti P10 a milion a pagrukodan ti Anti-Agricultural Economic Sabotage Act, a mamagbalin iti basol a saan a mapiansaan ken dagiti nakabasol, mabalin a maibaludda iti tungpal biag ken mamultada iti agingga iti maminlima a daras ti gatad dagiti naipuslit a produkto.

“Nainget ti linteg kadagiti agricultural smuggler gapu ta bigbigen ti linteg a ti panangsabotahe iti suplaytayo a taraon,  saan a gagangay laeng a panangballikog iti linteg,” inlawlawag ni !n Pangilinan.

(Hannah L. Torregoza/Manila Bulletin)