Inadmitir ni Cezarah "Sarah" Discaya idi Septiembre 1 a siam a construction company a kukuana ti makisalisal para kadagiti kontrata ti gobierno iti sidong ti Department of Public Works and Highways (DPWH).
Impalgak daytoy ni Discaya idi pinalutpot isuna ni Senate President Pro Tempore Jinggoy Ejercito Estrada iti naangay a panagimbestigar ti Blue Ribbon Committee ti Senado maipapan kadagiti maipagarup a panagkunniber ken anomalia iti panangted ti DPWH iti kontrata para kadagiti flood control project.
Nupay inlibak ni Discaya idi damo ti maipagarup a panangsuitikna kadagiti bidding ti proyekto, impudnona met laeng a makipaspaset dagiti kompaniana iti bidding.
Segun ken ni Discaya, dagiti laeng kompania nga Alpha and Omega (General Contractor and Development Corp.) ken St. Gerrard (Construction and Development Corp.) ti saan a makipaspaset iti bidding, idinto nga agkakaduan dagiti dadduma pay a kompania.
DOH, namakdaar iti posible a pannakadangran iti Traslacion
Malaksid pay iti Alpha and Omega General Contractor and Development Corp. ken St. Timothy Construction Corp. -- a nairaman iti 15 a contractor a dinakamat ni Presidente Marcos a kaaduan ti naala a flood control project, inaklon ni Discaya a makipagtagikua isuna kadagiti dadduma pay a construction firm.
Makipagtagikua ni Discaya kadagiti kompania a St. Gerrard Construction and Development Corp., St. Matthew General Contractor and Development Corp., Elite General Contractor and Development Corp., Amethyst Horizon Builders and General Contractor and Development Corp., YPR General Contractor and Construction Supply Inc., Great Pacific Builders and General Contractor Inc., ken ti Way Maker One Person Corp.
Kinuna ni Discaya nga agsasalisal amin dagitoy a kompaniana para iti maysa a kontrata.
Binabalaw daytoy ni Estrada, ket kinunana a saan a lehitimo a bidding ti maar-aramid ta maymaysa laeng a tao ti agtagikua kadagiti siam a kompania nga agsasalisal, ket uray asino kadagitoy ti mangabak, ni Discaya latta ti nangabak.
Impaganetget ni Estrada a dagitoy nga anomalia ti mangdadael iti transparensia ken pannakadusa dagitI nakabasol, ken mangikkat iti napudno ken napintas a serbisio iti publiko.
Iti isu met laeng a hearing, inaklon ni Discaya nga adda 28 a luxury vehicle-na a ginatangna manipud iti Frebel Enterprises and Autoart Luxury Cars, nga agbalor iti dandani ₱200 a milion.
Sumagmamano kadagiti lugan ti pamiliana ti Rolls Royce Cullinan (agbalor iti ₱42 a milion), Mercedes Benz Maybach (₱22 a milion), Bentley Bentayga (₱20 a milion), Mercedes Benz-AMG Wagon G63 (₱20 a milion), dua a Cadillac Escalade (₱11 a milion ti maysa), dua a GMC Yukon Denali (₱11 a milion ti maysa), Range Rover Autobiography (₱16 a milion), Range Rover Defender (₱7 a milion), Range Rover Evoque (₱5 a milion), ken Chevrolet Suburban (₱3 a milion). (Dhel Nazario/Manila Bulletin//Lito Hilidon/Bannawag)
