Kiddawen ni Sekretario ti Department of Justice (DOJ) Jesus Crispin C. Remulla iti Office of the Ombudsman (OMB) a resolbarenda a dagus ti kaso a maibusor kenkuana ken kadagiti kakaduana a nainaig iti pannakaarestar ni dati a presidente Rodrigo R. Duterte idi Marso.
Segun ken ni Remulla, a maysa kadagiti agngayangay a kas Ombudsman, mangipila isuna iti "motion to resolve" iti OMB iti kabiitan a panawen.
No bilang inominar isuna ti Judicial Bar and Council (JBC) ken isu ti dutokan ti presidente a kas Ombudsman, impaganetget ni Remulla a saan a rumbeng a maaramat ti OMB a kas igam iti politika.
Idi Mayo, nangipila ni Senador Imee Marcos iti kaso iti OMB kontra ken ni Remulla ken kadagiti dadduma pay a kakaduana a naidarum iti kaso nga arbitrary detention segun iti Article 124 ti Revised Penal Code (RPC), usurpation of judicial functions, pananglabsing iti Anti-Graft and Corrupt Practices Act, ken pananglabsing iti Republic Act No. 7438 a nangipasdek iti kalintegan dagiti naibalud a tao.
Mapukpukaw a nobia, nasarakan iti Pangasinan
Maigapu daytoy iti pannakakemmeg ni Duterte a nakaditene itan iti The Hague, The Netherlands gapu iti kaso a crimes against humanity a naidatag iti ICC.
Patien ni Remulla nga umisu laeng ti inaramidda iti pannakaarestar ni Duterte, ta isu ti annongenda tapno agtalinaed a natalged ti pagilian, maliklikan ti riribuk, ken maliklikan dagiti pasamak a di maikanatad. (Jeffrey Damicog/Manila Bulletin//Lito Hilidon/Bannawag)
