Ad-adu a nataengan a Filipino ti nagkuna a simmayaat ti kalidad ti biagda iti napalabas a tawen, segun iti resulta ti surbey ti Social Weather Stations (SWS) a naipablaak idi Septiembre 2.
Maibasar iti survey nga insayangkat ti SWS manipud Hunio 25 agingga 29, 35 a porsiento dagiti respondent ti nagkuna a simmayaat ti kalidad ti biagda no idilig iti napalabas a 12 a bulan, idinto a 42 a porsiento ti nagkuna nga awan nagbaliwan ti biagda, ket 23 a porsiento met ti nagkuna a kimmaro wenno rimmigat ti kasasaad ti panagbiagda.
Ibilang ti SWS a "gainer" dagiti nagkuna a simmayaat ti biagda, ken “loser” dagiti nagkuna a kimmaro ti biagda, idinto nga “unchanged” dagiti nagkuna a saan a nagbaliw ti biagda.
Impakita ti surbey ti nangatngato a bilang dagiti "gainer" iti kaaduan a lugar malaksid iti Balance Luzon (Luzon iti ruar ti Metro Manila).
Marcos, Robredo, nagsarak iti Naga city
Ti Visayas ti kaaduan a "gainers" nga addaan iti +22 a puntos, sumaruno ti Mindanao (+16) ken ti Metro Manila (+10).
Naaramid ti Second Quarter 2025 Social Weather Survey babaen ti rupanrupa nga pananginterbiu kadagiti 1,200 nga nataengan iti entero a pagilian: 300 iti tunggal lugar kas iti Metro Manila, Balance Luzon , Visayas, ken Mindanao. (Ellalyn De Vera-Ruiz/Manila Bulletin//Lito Hilidon/Bannawag)
