Pinalagipan ti gobierno dagiti overseas Filipino worker (OFW) iti Singapore, kasta met dagiti dadduma pay a Filipino nga agpangpanggep nga agtrabaho iti Singapore, a nainget a surotenda dagiti linteg ti Singapore maipapan iti panagtrabaho.
Iti advisory nga inruar ti Department of Migrant Workers (DMW) idi Septiembre 2, iti pannakikoordinarna iti Philippine Embassy iti Singapore, imballaagna a ti panangala iti ania man a masuelduan a trabaho iti ruar malaksid iti kangrunaan a pagtrabahuan, a gagangay a pagaammo a kas “moonlighting” wenno "part time" a trabaho ket maysa a paglabsingan iti linteg ti Singapore a pakasagrapan iti pannusa.
Segun iti advisory, mamulta dagiti ganggannaet a trabahador iti agingga iti SGD20,000 ken/wenno mabalud iti agingga iti dua a tawen. Mabalin pay a mawaswas ti working pass ken maparitanton nga agtrabaho iti Singapore ti asino man a ganggannaet a trabahador nga illegal nga agtrabtrabaho.
Nairuar ti palagip kalpasan nga imbilin ti maysa a korte ti Singapore iti maysa a 53-anios a Filipina a household worker nga agbayad iti SGD13,000 (agarup ₱579,000) gapu iti panagtrabahona a kas part-time cleaner kadagiti aldaw ti panaginanana.
Marcos, Robredo, nagsarak iti Naga city
Agtrabtrabaho ti nasao nga OFW iti Singapore sipud pay idi 1994, ket naduktalan nga agpa-part time nga agdalus iti nagbaetan ti 2018 ken 2024, a pananglabsing kadagiti kondision ti work pass-na a mangipalubos laeng kenkuana nga agtrabaho para iti opisial nga amona.
Namulta met iti SGD7,000 ti amona a nangtangdan kenkuana nga ag-part time.
Impalagip pay ti embahada ti Filipinas kadagiti turista a Filipino ken dadduma pay nga apagbiit la a bisita a saanda a makipaset iti ania man a masuelduan a trabaho, malaksid no maikari iti work pass exemption ti aktibidadda a mainaig iti trabaho. (Marita Moaje/PNA)
