Nasamsamen ti Bureau of Customs (BOC) amin a 12 a nangingina a lugan a nainaig iti pamilia Discaya, a nairaman iti search warrant nga impaulog ti Regional Trial Court of Manila, Branch 18.
Iti maysa nga statement idi Septiembre 2, kinuna ni Commissioner ti BOC Ariel F. Nepomuceno a naalada aminen a 12 a nangingina a lugan, a saanda a naala amin idi damo, iti headquarters ti St. Gerrard Construction General Contractor and Development Corp. iti Siudad ti Pasig.
Insayangkat ti Intelligence and Enforcement units ti BOC ti operasion idi agsapa ti Septiembre 2, a dua pay laeng ti naalada idi damo: ti Toyota LC300 3.3 V6 ZX AT SUV 2024 ken Maserati Levante Modena 2022.
Idi saanda masarakan ti yan dagiti 10 pay a lugan, binallaagan ni Nepomuceno dagiti pamilia Discaya a siguraduen ti BOC a masarakanda amin a 12 a lugan iti saan nga agbayag.
Marcos, Robredo, nagsarak iti Naga city
Iti rabii, kinompirmar ti BOC nga insuko dagiti Discaya dagiti pito pay a lugan ket naalada iti uneg ti solar ti St. Gerrard Construction General Contractor and Development Corp. dagiti sumaganad: Rolls Royce Cullinan, Bentley Bentayga, Mercedes Benz G-500, Mercedes AMG G 63 AMG, Toyota Tundra, Toyota Sequoia, ken Cadillac Escalade.
Segun ken ni Nepomuceno, dagiti naudi a tallo a lugan --maysa a GMC Yukon Denali ken dua a Lincoln Navigator--ket maipatpatarimaan ket maisuko iti BOC apaman a matarimaan.
Pormal a sineluan ti BOC dagiti 12 a lugan ken inoran-oras a bantayan ti BOC ken dagiti kameng ti Philippine Coast Guard (PCG). Beripikarenda dagiti importation record dagitoy a lugan no maitunos met laeng iti paglintegan ti BOC.
Nagyaman ni Nepomuceno iti tulong kadakuada ti Department of Transportation (DOTr) - Land Transportation Office (LTO), Philippine National Police (PNP)-Eastern Police District (EPD), Highway Patrol Group (HPG), Philippine Coast Guard (PCG), ken kadagiti opisial ti Barangay Bambang iti Pasig City tapno maisayangkat ti pannakasamsam dagiti nasao a lugan. (Derco Rosal/Manila Bulletin//Lito Hilidon/Bannawag)
