Imbilin ni Presidente Marcos Jr. ti maysa a nasaknap a panangrepaso iti singasing a badiet ti Department of Public Works and Highways (DPWH) para iti 2026, ken binilinna met ti Department of Budget and Management (DBM) ken ti baro a nadutokan a sekretario ti DPWH a ni Vince Dizon a mangikkat kadagiti mapagduaduaan a naiserrek (insertions) iti badiet ken mangsigurado nga umisu ti pannakagasto iti tunggal piso a kuarta dagiti umili.
Iti naangay a press briefing ita nga aldaw, Septiembre 3, inlawlawag ni Undersecretary ti Presidential Communications Office (PCO) Claire Castro a napardas ngem nainget ti panangrepaso iti badiet tapno masigurado ti tranparensia ken maliklikan ti pannakaitantan daytoy iti Kongreso.
Kinuna ni Castro a no nairaman manen dagiti nalpasen a proyekto iti National Expenditure Program (NEP), rumbeng a maikkat dagitoy.
'Tangay saanen a mabalin a babawyen ti NEP iti kanito a mayawaten daytoy iti Kongreso, ania man a rumbeng nga aturen ket maipakaammo babaen ti errata -- dagiti dokumento a mangbaliw wenno mangikkat kadagiti mapagduduaan a proyekto a naipan iti NEP.
Senado, pinasingkedanna ti ₱6.793-trilion a nailian a badiet para 2026
Gapu iti daytoy, mabalin a makissayan ti badiet ti DPWH para iti 2026.
Impaganetget ni Castro a saan a pirmaan ni Presidente Marcos ti ania man a mapagduaduaan a proyekto a mapalusposan ti Kongreso. (Argyll Cyrus Geducos/Manila Bulletin//Lito Hilidon/Bannawag)
