Impasardeng pay laeng ti Department of Public Works and Highways (DPWH) dagiti bidding para iti amin a pinonduan ti lokal a gobierno a proyekto a para impraestruktura iti entero a pagilian, kas pananglaban iti panagkunniber iti babaen ti baro a sekretario a ni Vince Dizon.
Inwaragawag ni Dizon, ita nga aldaw, Septiembre 3, a repasuenda ti proseso iti bidding a maitunos iti pammilin ni Presidente Marcos Jr. kalpasan a maipasungalngal ti DPWH iti kontrobersia maigapu kadagiti naanomalia a flood control project.
Mairaman a nasuspenso dagiti amin nga impraestruktura a proyekto ti DPWH kas iti kalsada ken flood control project manipud kadagiti opisinada iti nasional, rehional, ken distrito.
Ngem agtultuloy latta ti bidding kadagiti proyekto a pinonduan ti ganggannaet ta bambantayan met dagiti ganggannaet a kaasmang ken mamagbaga dagitoy a proyekto.
Mapukpukaw a nobia, nasarakan iti Pangasinan
Impaganetget ni Dizon a talkenna laeng nga awan ti panagkunniber kadagiti proyekto ti ahensia no maipasdek dagiti pagalagadan, ta dina kayat a maulit dagiti pasamak iti kallabes.
Dagiti kontrobersia iti akem ti DPWH kadagiti naanomalia a flood control project ti gapuna a naglusulos a dagus ni dati a sekretario Manual Bonoan.
Iti panagtakemna a kas daulo ti DPWH, inyunay-unay ni Dizon a saanen nga ipalubos ti DPWH dagiti nababa ti kalidadna nga impraestruktura ken dagiti makunkuna a "ghost project."
Kiniddaw pay ni Dizon a maipaulog koma ti immigration lookout bulletin order (ILBO) kadagiti opisial ti gobierno ken daulo dagiti construction company a mapapati a nairaman kadagiti naanomalia a flood control project.
Mapan a 26 nga opisial ti DPWH ken contractor, agraman dagiti contractor a da Curlee ken Sarah Discaya, ti nailista iti dokumento nga impakita ni Dizon kadagiti kameng ti media.
Innayon ni Dizon a kasaritana met dagiti dati a sekretario ti DPWH a da Jose De Jesus, Rogelio Singson, ken Mark Villar.
Nagpaay a sekretario ti DPWH ni De Jesus iti administrasion ni Corazon Aquino, idinto ni Singson ti nangidaulo iti DPWH idi presidente ni Benigno Aquino III.
Ni Villar, nga agdama a senador, ti daulo ti DPWH idi presidente ni Rodrigo Duterte, ken maysa kadagiti kangrunaan a nangidaulo iti "Build, Build, Build" program ni Duterte. (Dexter Barro II/Manila Bulletin//Lito Hilidon/Bannawag)
