Indeklarar ti Integrated Bar of the Philippines (IBP) ti di agressat a pannanglabanda iti panagkunniber babaen ti panangipasdekda iti Anti-Corruption Desks (ACD) iti amin a chapter-da iti entero a pagilian.
Iti statement nga inruar ti IBP ita nga aldaw, Septiembre 5, agawat dagiti ACD kadagiti reklamo ken ebidensia, ken mangpapardas iti remedio kontra iti panagkunniber, nangruna kadagiti naanomalia a flood control project ken dadduma pay a proyekto para iti impraestruktura ti gobierno.
Buangayen met ti IBP ti Committee on Good Governance tapno mangipaay iti patas a kapanunotan, agimbestigar kadagiti maipagarup a panagkunniber, ken mangitandudo iti integridad ken serbisio publiko.
Segun iti IBP, dagiti naibutaktak a ghost ken sub-standard a flood control project ket saan a bassit laeng a panangabuso, no di ket pagilasinan iti naun-uneg a sakit a mangdadael iti prioridad, mangrakrak iti panagtalek, ken mangisalda iti masakbayan dagiti umili.
Retirado a heneral, nakemmeg gapu iti panangsugsog a mangtippuog iti gobierno
Kinuna ti IBP a ti panagkunnniber ket saan laeng a pagkurkurangan ti gobierno no di ket pagilasinan ti maysa a sistema a pinakapuy ti saan a pannakadusa dagiti nagbasol ken bulsek a panangsuporta, a nanggubuay iti pannakadadael ti panagtalek ti publiko, a kas man gagangayen dagitoy nga aramid.
Daytoy nga anti-corruption campaign iti entero a pagilian ket paset ti pannakitulag ti IBP iti Anti-Red Tape Authority (ARTA) a mangpasayaat it pannakaipaay iti serbisio ti gobierno ken mangtaming iti panagabuso ti turay. (Jeffrey Damicog/Manila Bulletin//Lito Hilidon/Bannawag)
