Mabalin a manayonan dagiti kaso a sanguen ni Kingdom of Jesus Christ (KOJC) founder Pastor Apollo Quiboloy, segun ken ni Manila 3rd district Rep. Joel Chua.
Segun ken ni Chua, daulo ti Committee on Good Government and Public Accountability ti Kamara, mabalin pay a maidarum ni Quiboloy iti kaso a syndicated estafa, gapu ta dagiti donasion a naggapu iti abroad--a maipaay koma iti charity--ket mapapati a nausar iti nananam-ay a panagbiag ni Quiboloy.
Naibutaktak daytoy iti motu propio a panagimbestigar ti House Committee on Justice iti maipapan iti lima a dekadan ti tawenna nga extradition law ti pagilian.
Dinagadag ni Chua ti Anti-Money Laundering Council (AMLC) nga adalenda no ania pay ti mabalin nga ikaso ken ni Quiboloy mainaig iti wagas ti KOJC a panangur-or iti pondo.
Mapukpukaw a nobia, nasarakan iti Pangasinan
Kinompirmar ti pannakabagi ti AMLC a ti estafa, agraman ti syndicated estafa, ket maibilang a paset ti kaso a money laundering segun iti linteg ti Filipinas.
Iti sabali a bangir, impalgak ti pannakabagi ti AMLC a pinatganen ti Court of Appeals (CA) ti kiddawda a mangsukimat iti banko ken freeze order mainaig iti tallo a kaso ni Quiboloy iti Estados Unidos (US), Quezon City, ken Pasig City.
Ngem inlawlawag ti AMLC a ti tignayda kas iti panangsukimat iti banko, freeze order, ken ti umadani a civil forfeiture case, ket maigapu iti kaso ni Quiboloy a trafficking iti Filipinas ken US, saan a ti estafa.
Naakusaran ti KOJC a mangipatpatulod kadagiti kamengda a mapan iti ballasiw taaw tapno agdawat iti donasion a kunada nga agpaay kadagiti nakurapay iti Filipinas, ngem kuna dagiti autoridad a dagiti maur-orda a kuarta ket mapan iti pondo ti KOJC ken usaren ni Quiboloy iti nanam-ay a panagbiagna. (Ellson Quismorio/Manila Bulletin//Lito Hilidon/Bannawag)
