Mabangon iti probinsia ti Ilocos Norte ti sabali pay a dakkel a proyekto iti hybrid renewable energy babaen ti lease agreement iti nagbaetan ti gobierno probinsial ken ti Alba Renewables Philippines Corp.
Mabangon ti proyekto iti agarup 100 nga ektaria ti kalawana a a pagpastoran, a pagaammo a kas Dungon-Dungon Estate, iti Barangay Baruyen iti ili ti Bangui ken Barangay Nagsurot iti ili ti Burgos. paset daytoy ti lote a kukua ti gobierno addaan dagup a kalawa 256.88 nga ektaria.
Kas panangbigbig ti gobierno probinsial iti potensialna iti renewable energy, babaen ti Ilocos Norte Trade and Investment Office (INvest Office), inlasinna ti sumagmamano a sanikua a kukua ti gobierno a mabalin a maipaabang a matingiting segun iti feasibility, availability, ken policy determination.
Mairaman ditoy ti Dungon-Dungon Estate, a nakita ti maysa nga agipupuonan a mayat a mangpadur-as iti sanikua no mapasingkedan a feasible.
Farm specialist iti Abra, napaltogan
Kinuna ti daulo ti INvest Office a ni Ronaleigh Bueno, iti interview ti PNA idi Septiembre 5, a tapno mapormalisar ti katulagan, naituding ti ceremonial contract signing inton Septiembre 8.
“Manamnama a mangpataud ti proyekto iti panggedan, mangipaay iti panagsanay kadagiti lokal a residente, mangpataud iti lease revenues para iti gobierno probinsial, ken mangipaay iti tulong kadagiti host barangay,” kinunana.
Segun kenni Bueno, panggep ti kaunaan a hybrid plant a maipasdek iti probinsia a maaddaan iti kabaelan a mangpataud iti enerhia manipud iti angin ken init, ken addaan kakuyog a sistema ti battery energy storage solution a mangusar iti natural a kasasaad ti Bangui ken Burgos, a pakasarakan dagiti agdama a solar ken wind power farm.
Kinunana a daytoy a gannuat ket mangpapigsa iti posision ti Ilocos Norte kas renewable energy capital iti pagilian.
Itay nabiit, inaprobaran ti Sangguniang Panlalawigan ti Ilocos Norte ti pannakaited ti special incentives tapno makaawis ti ad-adu pay nga agipupuonan a naitunos kadagiti top priority industries ti probinsia.
Mairaman ditoy ti pannakapaabang dagiti saan unay a maus-usar a sanikua ti gobierno iti agingga iti lima a tawen kadagiti kualipikado a developer ken operator dagiti economic zone ken industrial estate.
Dagiti mabalin a proyekto kadagitoy taraon ken agrikultura, turismo ken creative industry, panagpartuat, renewable energy, information technology ken business process management, dagiti serbisio, ken panagminas ken quarrying. (Leilanie Adriano/PNA)
