Nadanon ti Filipino tennis ace a ni Alex Eala ti finals ti torneo a Guadalajara 125 Open kalpasan a pinarmekna iti semifinals ti kalabanna nga Amerikana a ni Kayla Day, iti iskor a 6-2, 6-3, iti Panamerican Tennis Center hardcourt iti Zapopan, Mexico itay agsapa ita a Sabado, Septiembre 6 (oras ti Manila).
Makasangona para iti kampeonato ti Hungarian a ni Panna Udvardy, a nangatiw iti Russian a ni Maria Kozyreva, 6-3, 6-4, iti semis.
Nagteng ni Eala, agdama a World No. 75 iti Women's Tennis Association ranking, ti semis kalpasan nga inabakna dagiti sumaganad: ti Italiana a ni Nicole Fossa Huergo, 7-6 (2), 6-2 (quarterfinals); ti Amerikana a ni Varvara Lepchenko, 6-7 (3), 7-6 (3), 6-3 (2nd round); ken ti Dutch a ni Arianne Hartono, 6-2, 6-2 (1st round).
Immuna a nakastrek iti WTA Tour ti 20-anios a ni Eala idi 2021. Iti 2025 Miami Open idi Marso, inabakna dagiti kampeon ti Grand Slam a da Jelena Ostapenko, Madison Keys, Iga Swiatek tapno makadanon iti semifinal round, a nagsanguanda ken ni Jessica Pegula, 6-7 (3), 7-5, 3-6.
Kasapulan ti natibker ken nainkalintegan a pagtaktakderan iti parikut iti WPS --NMC
Nagtengna ti kaunaan a WTA finals-na iti Lexus Eastbourne Open idi Hunio, ngem naupay ti panagkampeonna koma ta naatiw iti Australiana a ni Maya Joint, 4-6, 6-1, 6-7 (10).
Idi Agosto, iti US Open, inabak ni Eala ken ti World No. 14 a ni Carla Tauson ti Denmark, 6-3, 2-6, 7-6 (13-11), iti umuna a round ket nagbalin a kaunaan a Filipino a nangabak iti main draw match iti maysa a Grand Slam event. (Jean Malanum/PNA)
