Gapu iti panagtaktakaw dagiti dadduma a kabangibang a pagilian iti rekursos ti Filipinas iti taaw, impalgak ti maysa nga opisial ti Estados Unidos (US) a mangala ti administrasion ni Trump kadagiti Filipino a mangngalap nga agpaay a kas first line iti panangmonitor kadagiti illegal a panagkalap iti pagsusupiatan a paset ti West Philippine Sea (WPS).
Impasigurado ni Principal Deputy Assistant Secretary of State for East Asian & Pacific Affairs Jonathan Fritz iti Filipinas a ti foreign aid ti US ket maipamaysa iti panangparmekda iti illegal a panagkalap, a manggubuay iti natibker a sektor ti enerhia, ken mangparang-ay iti pangnegosio iti pagilian.
Imbutaktak ni Fritz ti panggepda a makitinnulong kadagiti Filipino a mangngalap nga agbalin a kas mata ken lapayagda a mangiyallatiw iti real-time information kadagiti local government unit (LGU) ken iti nailian a gobierno maipapan kadagiti illegal a panagkalap, panangdadael kadagiti koral, ken panangmulit iti taaw, ken dadduma pay.
Inlawlawag ni Fritz a dagiti probinsia nga asideg iti West Philippine Sea ti pakayimplementaran ti programa.
Kasapulan ti natibker ken nainkalintegan a pagtaktakderan iti parikut iti WPS --NMC
Impanamnama ni Fritz a ti $63 a milion (agarup P3-B) a pondo nga inkari ni Secretary of State Marco Rubio idi Hulio ket saan pay nga isu ti maudi a tulong nga ipaar ti administrasion ni Trump it laksid ti polisia ti US a pannakapabaro dagiti ipaayda a foreign assistance.
Innayon ni Fritz a kayat nga ipakita ti US ti nasinged a pannakigayyemda iti Filipinas, ta ti Filipinas ti umuna a makaawat iti baro a foreign assistance funding. (Raymund Antonio/Manila Bulletin//Lito Hilidon/Bannawag)
