Pormal a nangipaulog ni Bicol Saro Party-list Rep. Terry Ridon iti subpoena para kadagiti lima a contractor a saan a dimmar-ay iti umuna a hearing ti Infrastructure Committee (infra comm) ti Kamara mainaig kadagiti naanomalia a flood control project.
Naikkan iti subpoena da Sarah Discaya (Alpha & Omega General Construction), Mark Arevalo (Wawao Builders Corp.), Miguel Juntura (St. Timothy Construction Corp.), Eumir Villanueva (Topnotch Catalyst Builders), ken Sally Santos (Syms Construction Trading).
Nabilinda a dumar-ay iti hearing ti infra comm iti 9:00 ti agsapa inton Septiembre 9, makalawas kalpasan a naangay ti umuna a hearing ti komite.
Saan a kas iti gagangay a panangawis, ti subpoena ti nabilbileg a mandar a panangayab iti maysa a tao a dumar-ay iti panagimbestigar ti Kamara.
Senado, pinasingkedanna ti ₱6.793-trilion a nailian a badiet para 2026
No saan latta a mangikankano dagiti naikkan iti subpoena, kuna ni Ridon a kapilitan nga ipakatda ti power of contempt ti Kamara segun iti Section 11 ti Rules of Procedure Governing Inquiries in Aid of Legislation.
Malaksid iti daytoy, kiniddaw ti infra comm a maipaulog koma ti Immigration Lookout Bulletin Order (ILBO) para iti pamilia da Sally Santos ti Syms Construction Trading ken Herbert Matienzo, dati nga executive director ti Philippine Contractors Accreditation Board (PCAB).
Ni Ridon ti daulo ti infra comm a buklen ti tallo a komite ti Kamara: ti Committee on Public Accounts, ti Committee on Good Government and Public Accountability, ken ti Committee on Public Works and Highways. (Ellson Quismorio/Manila Bulletin//Lito Hilidon/Bannawag)
