Imbuddak manen ni Alex Eala ti naganna iti pakasaritaan ti tennis, kalpasan a nagun-odna ti kaunaan a titulona iti Women’s Tennis Association (WTA) babaen ti makapikapik a 1-6, 7-5, 6-3 nga iskor a pinangatiwna ken ni Panna Udvardy ti Hungary iti Guadalajara 125 Open idi Domingo, Septiembre 7 (oras iti Filipinas).
Iti panangipakitana iti kinasimbeng ti takderna iti baet ti pressure, nabangon ti 20-anios a kangrunaan a Filipina a tennis player iti agdama manipud iti kasla di nakananama a rugina ket impamatmatna ti naisangsangayan a regget ket ganetgetna a tapno makontrolna manen ti laban--a namkuatanna a nagbalin a kaunaan a Filipina a nangabak iti WTA singles crown.
Idi napan a Hunio, dandaninan naala dayta a korona iti Eastbourne Open, a maysa a WTA250 event, iti Great Britain idi makasangona iti finals ni Australiana a Maya Joint.
Nainayon daytoy a pammadayawna kas maysa kadagiti kalalaingan a tennis player iti lubong kadagiti napalabas a lima a singles titles-na iti International Tennis Federation (ITF) ken tallo iti ITF doubles.
Mapukpukaw a nobia, nasarakan iti Pangasinan
Nasam-it ken makapnek a balligi daytoy para ken ni Eala, a simrek iti torneo kas second seed babaen ti ranggona World No. 75. Dua laeng a set ti nakaatiwanna sibubukel a lawas, agraman ti umuna a set kontra ken ni Udvardy iti finals.
Kaskasdi, tinakderan ni Eala iti karit ket timmayaktak iti 5-3 a iti maikadua a set, a nayabot met ti Hungarian iti iskor a 5-all. Ngem natengngel ti Filipina ti pulsona ket binueltana ti serve ni Udvardy iti maika-11 a game sakbay nga inserrana ti set iti maika-12 tapno magtengda ti maysa a decider.
Ginundawayan ni Eala ti reggetna kontra iti nagtultuloy a panangirupr ni Udvardy. Nagun-odna ti napateg a break iti maikanem a game iti maikatlo a set tapno umabante iti 4-2. Nupay nabalinan ni Udvardy ti nag-break back ken nangkissay iti giwang iti 3-4, daytan ti naudi a nabalinanna.
Tinarastasen ni Eala ti simmaruno a dua a game tapno magun-odna ti kadakkelan a panagballigi iti propesional a karerana.
Iti dalanna nga agturong iti titulo, rinugianna ti panangiganetgetna iti siglatna babaen ti dominante a 6-2, 6-2 a panagballigina kontra ken ni Arianne Hartono, sakbay a nakalasat iti makapaksuy a tallo a set a labanna ken ni Varvara Lepchenko, 6-7 (3), 7-6 (3), 6-3.
Iti quarterfinals, inkagumaanna a pinarmek ti nairut nga opening set ket inabakna ni Nicole Fossa Huergo, 7-6 (2), 6-2, kalpasanna, sa nangipaay iti napigsa a 6-2, 6-3 a panagballigi kontra ken ni Kayla Day tapno magtengna ti finals.
Naisangsangayan a season daytoy para ken ni Eala, a nakaitalimudokan ti imatang iti Miami Open idi Marso babaen ti nakaskasdaaw a semifinal finish a naipaganetgetna babaen kadagiti kasla di nakappapati a panangparmek kadagiti kampeon ti Grand Slam a da Jelena Ostapenko, Madison Keys, ken Iga Swiatek.
Naalana met ti umuna a panagballigina iti Grand Slam event iti US Open idi napan a lawas kalpasan a kinigtotna ti World No. 14 a ni Clara Tauson iti tallo a set. (Kristel Satumbaga-Villar/MANILA BULLETIN)
