Rimmuaren iti pagilian ti retirado a police colonel ken dati a general manager ti Philippine Charity Sweepstakes Office (PCSO) a ni Royina Garma, a nagturong iti Malaysia idi rabii ti Domingo, Septiembre 7, maysa aldaw kalpasan ti isasangpetna iti Filipinas manipud iti Estados Unidos (US) idi Septiembre 6.
Segun iti Bureau of Immigration (BI), naglugan ni Garma iti Ninoy Aquino International Airport Terminal 3 a napan iti Kuala Lumpur, Malaysia kas maysa a turista.
Naipasidong ni Garma iti Immigration Lookout Bulletin Order (ILBO) gapu kadagiti kaso a kriminal a naipila kontra kenkuana idi 2016 ken 2020, ngem kinuna ti BI a saan a mabalin a lapdan dagiti immigration officers ti panagbiahe ni Garma ta awan met ti naipaulog a hold departure order (HDO) kenkuana.
Inlawlawag ti BI a ti ILBO nga impaulog ti Department of Justice (DOJ) ket mangwanawan laeng iti panaggunay ti maysa a tao, ket ti laeng HDO nga impaulog ti korte ti mabalin a manglapped iti panagbiahe ti maysa a tao.
Mapukpukaw a nobia, nasarakan iti Pangasinan
Iti congressional hearing iti napan a tawen, nagtestimonia ni Garma nga adda ipatpatungpal dagiti polis a reward system kadagiti nakapapatay kadagiti drug suspect idi naisayangkat ti war on drugs ni dati a presidente Rodrigo Duterte.
Pimmanaw ni Garma iti Filipinas idi 2024 ngem naidetine iti US gapu ta nakanselar ti visa-na. Nai-deport daytoy idi napan a lawas, ket simmangpet iti Filipinas idi Septiembre 6. (Jeffrey Damicog/Manila Bulleting//Lito Hilidon/Bannawag)
