Nabotosan ni Sen. Vicente “Tito” Sotto III ita a Lunes, Setiembre 8, kas baro a presidente ti Senado idinto a napadisi ni Sen. Francis “Chiz” Escudero iti puesto, kalpasan dagiti kritisismo a ginubuay dagiti kontrobersia iti programa ti panangkontrol ti layus ti gobierno a madama nga im-imbestigaren ti blue ribbon committee ti Senado.
Sakbayna, inyebkas ni Presidente Ferdinand “Bongbong” Marcos Jr. ti ungetna iti imbilangna a kadadaksan nga eskandalo ti panagkunniber a nangkibur iti agdama nga administrasion.
Sigud metten a nababalaw ni Escudero gapu iti panangisingitna iti ₱142.7 billion a proyekto ti impraestruktura iti 2025 national budget. Idi agangay, nairaman iti eskandalo ti flood control kalpasan a naipalgak a ni Lawrence Lubiano, a nairaman kadagiti 15 a mapabpaboran a kontraktor a nakaala kadagiti flood control project manipud iti Department of Public Works and Highways (DPWH) ket ti kangrunaan a kontribiutor iti pondo ti kampaniana idi kandidato a para senador.
Dagiti nangitantandudo iti resolusion a nangbotos ken ni Sotto kas lider ti Senado ket da Senador Panfilo “Ping” Lacson, Loren Legarda, Risa Hontiveros, ken Juan Miguel “Migz” Zubiri.
Mapukpukaw a nobia, nasarakan iti Pangasinan
Ni Escudero a mismo ti namagsapata para ken ni Sotto kas baro a presidente ti Senado, a binayabay ti asawana a ni Helen Gamboa, dagiti kameng ti pamiliana, ken dagiti dati a kameng ti Senate a minority bloc.
Impalgak met ni Sen. Joseph Victor “JV” Ejercito nga isu ti maika-15 a senador a nagpirma iti resolusion.
Iti panagbalbaliw ti liderato ti Senado, ni Lacson ti naipatugaw a kas Senate President Pro Tempore, idinto a ni Zubiri ti Senate Majority Leader.
Kas presidente ti Senado iti maikadua a gundaway, kinuna ni Sotto nga aramidenna ti amin a kabaelanna tapno masigurado nga agtalinaed a makikooperar ti Senado ngem independente, balanse, transparent, ken napudno. (Hannah L. Torregoza/MANILA BULLETIN)
