Inkari ni President Marcos Jr. nga ikkanna iti nasaknap a bileg ti agwaywayas a grupo wenno komision a mangimbestigar kadagiti naanomalia a flood control project, ta masapul a naun-uneg ti aramidenda a panagsukimat no kasano a naigamer ti panagkunniber iti proyekto para iti publiko.
Kuna ni Marcos idi Septiembre 7 nga itedna amin a kasapulan a bileg tapno maragpatda ti naan-anay a konklusion ken adda matakuatanda tapno ammona no ania ti napasamak.
Saan pay a pormal a nabukel ti agwaywayas a grupo, ngem maisina daytoy iti gobierno, saan a kas iti Commission on Audit (COA) wenno ti Office of the Ombudsman.
Nupay iringringpas pay laeng ti Malakanyang ti executive order a mangbukel iti agwaywayas a komision, kinuna n Marcos a buklen daytoy dagiti abogado, prosecutor, ken forensic investigator a mangsukjimat kadagiti ebidensia ken mangbigbig dagiti partido a nakabasol. (Argyll Cyrus Geducos/Manila Bulletin//Lito Hilidon/Bannawag)
