Inyam-ammo ti Philippine Navy (PN) ti kabarbaro a baporna, maysa a guided missile frigate, a naipanagan iti maysa a rebolusionario nga Ilokano a nakikadua dagiti puersa ti Britania tapno labananda dagiti Espaniol a kolonisador iti Filipinas.
Ti BRP Diego Silang (FFG-07), a maikadua a Malvar-class frigate iti fleet ti PN, ti maysa kadagiti most advanced a bapor a pakigubat ti Navy iti agdama.
“Addaan dagiti Miguel Malvar-class frigate iti ad-adu a napadur-as a kabaelan ngem iti Jose Rizal-Class Frigate,” kinuna ni Kapitan Marissa Martinez, pannakangiwat ti PN, ita Martes, Sept. 9.
Segun ken ni Martinez, dakdakkel ken ad-adu ti armasna dagiti Malvar-class frigatate. Agatiddog daytoy iti 118.4 a metro ken addaan iti displacement a 3,200 a tonelada, dakdakkel ngem ti BRP Jose Rizal (FF-150) a 107 a metro ti kaatiddogna ken addaan iti displacement a 2,600 a tonelada.
Mapukpukaw a nobia, nasarakan iti Pangasinan
Addaan kabaelan ti BRP Diego Silang a kapartak a 25 a knot, 4,500 a nautical a miles a range, ken mabalin nga agoperasion iti 20 a tuloytuloy nga aldaw iti baybay. Addan daytoy kadagiti nadumaduma a sonar ken radar, elektroniko a pakigubat ken decoy, missile, torpedo, kanion, ken makaawit iti maysa a naval helicopter.
Segun pay ken ni Martinez, addaan dagiti frigate iti ASW (anti-submarine warfare) ken anti-air capability. Kabaelanda a sanguen ti ania man a kita ti pangta iti maritime domain iti man angin, baybay wenno dadduma pay.
Nakisinnarak a naglayag ti BRP Diego Silang iti bapor ti Philippine Coast Guard (PCG) a BRP Gabriela Silang (OPV-8301) idi Lunes, Sept. 8, iti baybay ti Zambales.
Iti pakasaritaan, agassawa da Diego ken Gabriela Silang. Indauluan ni Diego ti maysa a panagalsa dagiti Ilokano tapno parmekenna dagiti Espaniol iti Amianan idi 1762 babaen ti pannakikaduada kadagiti puersa ti Britania. Ngem napapatay ni Diego iti ima ti maysa a nadekket a gayyemna idiay Vigan, Ilocos Sur idi 1763 ket intuloy ni Gabriela ti pannakigubat kadagiti Espaniol.
Malaksid ti BRP Gabriela Silang, nakisinnarak pay ti BRP Diego Silang iti BRP Jose Rizal iti agarup a 14 a nautical a milia iti amianan a laud manipud iti Botolan, Zambales.
“Apaman a makikaduan iti aktibo a fleet, padur-asen ti maikadua a Miguel Malvar-class frigate ti kabaelan ti PN iti operational readiness, maritime domain protection, ken kabalilnan a mangitandudo iti nawaya, natalged, ken naibatay iti annuroten nga international order,” kinuna ti Navy.
Agdalan pay ti BRP Diego Silang kadagiti pinal a panagsagana, acceptance procedures, ken commissioning sakbay nga opisial a makikadua iti aktibo nga armada ti Navy. (Martin Sadongdong/MB)
