Binabalaw ti Ateneo Human Rights Center (AHRC) ti pangngeddeng ti International Criminal Court (ICC) a mangitantan iti Confirmation of Charges hearing ni dati a presidente Rodrigo Duterte, a dati a naituding iti Septiembre 23.
Naitantan ti confirmation of charges hearing gapu iti kiddaw dagiti abogado ni Duterte gapu ta “not fit to stand trial” ti dati a presidente.
Segun iti AHRC, ti pannakaitantan ti confirmation of charges hearing ket saan a panangipateg iti nabayagen a kiddaw dagiti biktima a panangsungbat ni Duterte iti naaramid a war on drugs idi nagakem a presidente.
Dinakamat ti AHRC ti United Nations Declaration of Basic Principles of Justice for Victims of Crime and Abuse of Power, a mangimandar kadagiti estado ken institusion a mangitandudo iti kalintegan dagiti biktima a manggun-od iti hustisia nga awan ti pannakataktakna.
Senado, pinasingkedanna ti ₱6.793-trilion a nailian a badiet para 2026
Kinuna ti AHRC a ti kalintegan iti napardas a proseso ti hustisia ket saan laeng a kalintegan ni Duterte, no di ket, nangruna dagiti pamilia a napukawan gapu kadagiti pammapatay.
Dinagadag ti AHRC ti ICC a pardasanda koma a risuten dagiti nakapila pay nga isyu, ken mangikeddengdan iti petsa iti kabiitan a panawen, tapno masinunuo ti patas ken nainkalintegan a proseso para kadagiti biktima. (Jel Santos/Manila Bulletin//Lito Hilidon/Bannawag)
