Dinillaw ni Batangas 2nd district Rep. Gerville “Jinky Bitrics” Luistro ni Pacifico "Curlee" Discaya ll gapu iti impakitana a "selective amnesia" iti naangay a hearing ti Infrastructure Committee (infra comm) ti Kamara idi Septiembre 9, maipapan kadagiti naanomalia a flood control project.
Saan nga imbutaktak ni Discaya dagiti nagan ti opisial ti gobierno a nangala iti komision idi napalabas nga administrasion ni Duterte, idinto a nainagananna dagiti kameng ti Kamara ken opisial ti Department of Public Works and Highways (DPWH) iti agdama nga administrasion ni Marcos.
Iti hearing a naangay idi Septiembre 9, inadmitir ni Discaya a dagiti opisial idi panawen ni dati a presidente Rodrigo Duterte ket dimmawat met iti komision kenkuana, ngem saanna a ninaganan dagitoy.
Ngem iti affidavit-na iti Senate Blue Ribbon Committee hearing idi Lunes (Septiembre 8), napardas a nainaganan ni Discaya dagiti kongresman ken opisial ti DPWH iti agdama nga administrasion a mapapati a nakaala iti komision kadagiti naanomalia a flood control project.
Mapukpukaw a nobia, nasarakan iti Pangasinan
Pinalagipan ni Luistro ni Discaya a ti sinapataan a salaysay kas iti panagimbestigar ti Kongreso, kasapulanna ti naan-anay a pannakaipalgak, ket ti panagkedkedna a mangnagan kadagiti opisial manipud 2016 agingga 2022 ti manggubuay iti panagduadua iti kredibilidad ti affidavit nga indatagna iti Senado.
Segun ken ni Luistro, inadmitiren ni Discaya nga uray idi napalabas nga administrasion, adda dumawdawat iti komision.
Kinuna ni Luistro a ni Discaya ken dagiti kompaniana -- a mabigbig a Discaya Group of Construction Companies -- ket nakaala iti PhP12 a bilion a balor ti kontrata idi panawen ni Duterte ket ti kompania ni Discaya ti numero uno kadagiti contractor a kaaduan ti naala a dakkel a proyekto iti entero a pagilian.
Inlawlawag ni Luistro a saan a mabalin a mapilpili laeng ti isawang a kinapudno, ken saan a nakappapati a kabaelan ni Discaya nga inaganan dagiti opisial ti gobierno a nairaman iti 2023 agingga iti 2024, ngem linipatanna ti 2016 agingga 2022, ket mangigapu daytoy iti panagduadua iti linaon ti affidavit-na. (Ellson Quismorio/Manila Bulletin//Lito Hilidon/Bannawag)
