Binukel ni Presidente Ferdinand Marcos Jr. ita nga aldaw, Septiembre 11, ti agwaywayas ken nabileg a komision a mangimbestigar kadagiti mapapati nga anomalia iti flood control project ken dadduma pay a proyekto a para iti impraestruktura ti gobierno.
Babaen ti Executive Order (EO) No. 94, nabuangay ti Independent Commission for Infrastructure (ICI), a buklen ti maysa a chairperson ken dua a kameng a nalatak iti kinasaririt ken kinataknengda, a suportaran ti maysa nga executive director nga addaan ranggo a kas undersecretary, agraman full secretariat a mangtaming kadagiti teknikal ken administratibo a trabaho.
Mabalin nga iraman ti komision dagiti eksperto ken propesional kas mammagbaga ken consultant tapno tumulong iti panangimbestigar.
Segun iti EO, ipangpangruna ti ICI ti pannakarepaso dagiti flood control project iti napalabas a 10 a tawen.
Mapukpukaw a nobia, nasarakan iti Pangasinan
Naikkan iti karbengan ti ICI a mangipaulog iti subpoena, mangbilin iti pannakaparnuay dagiti dokumento, mangirekomendar iti pannakaidatag ti kaso a kriminal, sibil, ken administratibo iti Department of Justice (DOJ), iti Office of the Ombudsman (OMB), ken iti Civil Service Commission (CSC), ken makikoordinar kadagiti dadduma pay a paset ti gobierno.
Mabalinda pay nga irekomendar ti pannakatengngel dagiti sanikua, hold departure order, ken preventive suspension tapno agtalinaed ti kinasin-aw ti imbestigasion.
Binulan a mangidatag ti ICI iti report-da iti Office of the President ken maipablaak dagiti nagapuananda. Agtrabaho ti ICI agingga a matungpaldan ti naituding nga annongenda wenno no waswasen ida ti presidente.
Kinuna ni Marcos nga ipalgaknanto iti saan a mabayag dagiti kameng ti ICI, kalpasan a maipablaak ti EO. (Argyll Cyrus Geducos/Manila Bulletin//Lito Hilidon/Bannawag)
