Nagkedked ni Senate President Vicente "Tito" Sotto III a mangpirma iti kiddaw ni dati a daulo ti Blue Ribbon Committee Senador Rodante Marcoleta a maipan dagiti agassawa a Pacifico ken Cezarah Discaya iti Witness Protection Program.
Segun iti opisina ni Sotto itay rabii ti Mierkoles, Septiembre 10, naipaturong ken ni Sekretario ti Department of Justice (DOJ) Jesus Crispin Remulla ti surat ni Marcoleta ngem saan a pinirmaan ti Senate President daytoy.
Iti maysa nga interbiu daydi met la a malem, kinuna ni Sotto kadagiti kameng ti media a nagsurat kenkuana ni Marcoleta maipapan iti rekomendasion, ngem inyallatiw met ni Sotto ti surat iti baro a daulo ti Blue Ribbon a ni Senate President Pro Tempore Panfilo "Ping" Lacson.
Segun ken ni Sotto, yen-endorso ti surat ni Marcoleta ti pannakaipasidong da Discaya iti Witness Protection Program, ngem adalenda pay nga umuna daytoy a kiddaw.
Kasapulan ti natibker ken nainkalintegan a pagtaktakderan iti parikut iti WPS --NMC
Iti plenary session, impalagip ni Marcoleta iti Senado ti tulagan ti Blue Ribbon Committee, a dati nga indauluanna, nga ikkanda iti provisional immunity asino man kadagiti 15 nga agpaay a saksi iti panagimbestigarda iti flood control project. Immanamong ti komite no la ket saan a dagiti agkidkiddaw ti makuna a "most guilty" ken natungpalda dagiti legal a pagalagadan. (Dhel Nazario/Manila Bulletin//Lito Hilidon/Bannawag)
