Sinebseban ni Robert Ace Barbers, panakangiwat ni House Speaker Martin Romualdez, dagiti nagraira a sayangguseng nga aglusulosen ti daulo ti Kamara.
Segun ken ni Barbers idi Septiembre 10, awan ti rason nga aglusulos ti Speaker, nupay nagwarasen daytoy a sayangguseng iti ruar ti Kamara, ta 90 a porsiento ti 300 a kameng ti Kamara ti agtalek latta ken ni Romualdez.
Ni Romualdez ti presidente ti Lakas-Christian Muslim Democrats (Lakas-CMD) nga addaan iti 111 a kongresman, nga apagkatlo ti dagup dagiti kameng ti Kamara.
Kinuna ni Barbers a kinaubbaw no patien dagiti sayangguseng iti ruar ti Kamara, ta suportaran latta dagiti mayoria a kongresman ni Speaker Romualdez. (Ellson Quismorio/Manila Bulletin//Lito Hilidon/Bannawag)
Nasional
