Agdagup iti 100 nga exhibitor manipud Cagayan Valley (Region 2) ti mangidispley kadagiti naidumduma a produktoda iti regional trade fair a maangay inton maudi a paset ti Septiembre iti National Capital Region (NCR).
Naawagan a kas "Padday Na Lima," sao nga Ibanag ti "naaramid manipud iti ima," inorganisar ti Department of Trade and Industry (DTI) - Region 2 daytoy tapno maitandudo ti nabaknang a tawid ti Tanap ti Cagayan ken mangestablisar kadagiti koneksion kadagiti institusional ng aggatgatang.
"Ita a maika-19 a a pannakaiwayatna, maitampok ita a tawen iti trade fair dagiti kasayaatan a pagaammo a produkto kasta met dagiti baro ken innovative a produkto manipud iti Cagayan Valley," kinuna ni Atty. Michael Paggabao, DTI Region 2 Acting Assistant Regional Director, iti maysa nga online a komperensia ti media idi Mierkoles, Sept. 10.
Segun ken ni Paggabao, malaksid iti pannakailako dagiti lokal a produkto iti nalawlawa a merkado, agpaay pay ti trade fair a kas panangbigbig iti nalabon a rekursos ti rehion ken maysa a pakakitaan iti paglaingan, kina managparnuay, ken kinaanus dagiti umili ti rehion.
Farm specialist iti Abra, napaltogan
Kalpasan ti balligi ti edision idi napan a tawen, a nangpataud iti nasurok a ₱9.8 milion a paglakuan, kinuna ni Zenaida Quinto, Officer-In-Charge of the Business Development Division ti DTI Region 2 ken project director ti "Padday Na Lima," a pontiriada ti nasurok a ₱10 milion a maganar iti peria itoy a tawen, a mangitampok iti nadumaduma a food and non-food items.
Kinuna pay ni Quinto a maitampok pay iti peria dagiti espesial a pavilion a mangiparangarang kadagiti probinsia ti Rehion 2 ken dagiti kasasayaatan a produktoda, dagiti kangrunaan a destinasion ti turismo, ken dadduma pay a potensial a proyekto ti mapagpuonan.
Maitampok pay dagiti kangrunaan a proyekto ti Cagayan Valley iti kawayan ken niog tapno maitandudo dagiti pakausaranda, agraman ti pannakausarda a kas alternatibo a raw material para kadagiti muebles a kayo.
Maangay ti trade fair, nga addaan iti tema a ""Hues of Heritage: Celebrating Cagayan Valley's Colors of Trade and Tradition," iti Festival Mall Alabang iti Siudad ti Muntinlupa inton Sept. 19 agingga iti 25. ( Leilanie Adriano/PNA)
