Imbinglay ni Sekretario ti Department of Social Welfare and Development (DSWD) Rex Gatchalian kadagiti kongresman idi Septiembre 10, a narigat a tamingen ti parikut kadagiti aggigian iti kalsada iti Filipinas.
Iti naangay a hearing ti Appropriations Committee ti Kamara iti badiet ti DSWD para iti 2026, inaklon ni Gatchalian a saan a kabaelan ti ahensia nga enteramente nga ikkaten dagiti aggigian iti kalsada, ta dadduma kadakuada ket saanda a kayat ti agtalinaed kadagiti pagyanan nga ipaay ti DSWD.
Dagiti nakapadas nga agnaed kadagiti pagyanan nga impaay ti gobierno ket agsubli met laeng iti kalsada.
Kinuna daytoy ni Gatchalian idi insaludsod kenkuana ni Bukidnon 4th district Rep. Laarni Lavin Roque no ania ti programa ti DSWD para kadagiti awanan iti balay.
Senado, pinasingkedanna ti ₱6.793-trilion a nailian a badiet para 2026
Segun iti datos ti DSWD, adda 12,000 nga aggigian kadagiti kalsada iti Metro Manila.
Kinuna ni Gatchalian a 6,000 agingga 7,000 ti simmurot kadakuada nga inikkanda iti pagyanan kadagiti dati a POGO hub, malaksid pay kadagiti pinansial a tulong tapno makarugida manen iti biagda.
Nupay kasta, inlawalwag ni Gatchalian 50 a porsiento kadakuada ti saan a nagkamang iti DSWD tapno agpatulong iti pagyananda ken panawanda ti kalsada, ta saan a mabalin a puersaen ida ti DSWD.
Kinuna ni Gatchalian a naibatay latta iti kalintegan ti programa, idinto nga adda pagalagadan ti Commission on Human Rights (CHR) mainaig iti daytoy, isu nga uray kayat ti DSWD nga alaen ida, saanda a mapilit dagitoy no saanda a kayat ti sumurot.
Nagkiddaw ni Gatchalian iti tulong dagiti local government unit (LGU) ken dadduma pay a kaasmangda iti komunidad a tumulongda a mangallukoy kadagiti aggigian iti kalsada nga umasidegda iti DSWD. (Joseph Pedrajas/Manila Bulletin//Lito Hilidon/Bannawag)
