Natay ni Charlie Kirk, maysa a konserbatibo nga aktibista ken kasinged ni Presidente ti Estados Unidos Donald Trump a namagkaysa kadagiti botante a Republican, kalpasan a mapaltogan idi Mierkoles, Septiembre 10, iti naangay a taripnong iti Utah Valley University.
Ni Kirk, 31, ti co-founder ken CEO ti gunglo dagiti agtutubo a Turning Point USA.
"Nasipnget daytoy nga aldaw para iti estadotayo. Nakalkaldaang nga aldaw iti pagiliantayo," kuna ni Utah Gov. Spencer Cox.
Innayonna a maysa daytoy a pammapatay gapu iti politika.
Damag nga adda OFW a nairaman iti uram iti Hong Kong, im-imbestigaren ti DFA
Segun kadagiti opisial, addan iti sidongda ti maysa a person of interest, ngem saanda pay nga impalgak ti nagan, motibo, wenno ti agbalin a kaso daytoy.
Segun kadagiti agpalpaliiw, inyad-adda daytoy a pammapatay ti kumarkaro a pangta ti kinaranggas maipuon iti politika iti Estados Unidos iti naglabas a sumagmamano a tawen a nagsaknap kadagiti nagduduma a kapanunotan.
Adu ti nangkondenar manipud iti agsinnumbangir a partido ngem awan met latta ti maidatag a pamuspusan tapno maliklikan ti kinaranggas a maibusor kadagiti panagyebkas a mainaig iti politika.
Impanamnama ni Cox a madusa ti suspek segun iti linteg ti estado nga addaan iti death penalty. (Associated Press/Manila Bulletin//Lito Hilidon/Bannawag)
