Pimmusay ni premiado a mannurat Benjamin Pajarillo Pacris, iti edadna a 71 itay Septiembre 10.
Mannurat ti Bannawag, nalatak ni Ben, awagna kadagiti kasingedna, a kas lektiurer kadagiti press conferences nga ituytuyang ti Departamento ti Edukasion iti Region 1. Nagpapaay pay iti Philippine Information Agency, a nagretiruanna a kas Manager ti PIA-Ilocos Sur.
Sakbay ti ipupusayna, aktibo a kas radio ken TV anchor iti DWRS, IHC-Channel 16 ken Channel 8 ti Eagle Vision CATV iti Heritage City of Vigan.
Nagpapaay pay nga opisial ti GUMIL Ilocos Sur, GUMIL Filipinas, ken dadduma pay a media organization a pakairamanan ti binuangayna nga Ilocos Sur Integrated Press Corp a nagtakemanna a kas umuna a presidente.
Nabotosan, baro nga opisial ti Ilocos Sur Provincial Capitol Press Corps
Naipasngay ni Ben iti Siudad ti Laoag kada Bernardino Pacris ti Sanchez Mira, Cagayan, ken dati a Lucia Pajarillo ti Bantay, Ilocos Sur idi Hulio 7, 1954. Kaingungotna ni dati a Victoria de Vera, ken addaanda iti lima nga annak: Benjamin, Jefferson, Vanessa Ingrid, Charisse Ivy, ken Astrid Kathreen.
Nagtupos iti BSE-Communication Arts a kas iskolar iti Divine Word College of Laoag. Maysa pay a lisensiado a mannursuro.
