Pinatgan ti Manila Regional Trial Court (RTC) nga agpiansa ni dati a Negros Oriental Rep. Arnolfo Teves Jr., kas inwaragawag ti abogadona ita nga aldaw, Septiembre 12.
Segun ken ni Atty. Ferdinand Topacio, ₱120,000 ti inkeddeng ti Manila RTC Branch 12 a piansa ni Teves iti kaso a pammapatay (murder) ken ni Lester Bato idi Mayo 2019. Ni Bato ket badigard ni Cliff Cordova nga agngayangay idi a mayor ti Basay, Negros Oriental.
Ngem inlawlawag ni Topacio a saan pay a makaruar ni Teves, ta urayenda pay ti pangngeddeng ti korte iti kiddaw ni Teves nga agpiansa para iti dadduma pay a kasona.
Nairaman ditoy ti kasona a pammapatay iti dua a tao iti Negros Oriental idi 2019 ken dagiti dadduma pay a kasona a murder, attempted murder, ken frustrated murder iti pannakapapatay ni dati a gobernador ti Negros Oriental Roel Degamo ken dadduma pay a kakaduana idi Marso 4, 2023 iti Pamplona, Negros Oriental.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Topacio, daytoy ti pakakitaan a nakapuy dagiti kaso kontra ken ni Teves ta politika ti puon daytoy. (Patrick Garcia/Manila Bulletin//Lito Hilidon/Bannawag)
