Saan a kabaelan ni dati a presidente Rodrigo Duterte a makipaset iti panangbista kenkuana ti International Criminal Court (ICC) gapu iti mapapati a lumanlanlan a kasasaad ti salun-atna, ken saanna a kabaelan a sanguen ti legal a proseso.
Iti dokumento nga impila ti abogado ni Duterte a ni Nicholas Kaufman, kiniddawda iti ICC nga itantanda ti confirmation of charges hearing inton Septiembre 23 gapu ta saan a kabaelan ni Duterte ti manglagip, mangpanunot, ken mangipakat iti impormasion tapno mabilinna dagiti abogadona.
Dinakamat ni Kaufman dagiti eksperto iti medisina, ket kinunana a managlilipaten ni Duterte, ken ti di pannakabigbig daytoy kadagiti nasinged a kameng ti pamiliana ti mangipakita a dinan kabaelan a suroten dagiti panangbista.
Segun ken ni Kaufman, saan a nainkalintegan a piliten ni Duterte a mabista, ta saanna a matarusan dagiti makagapu wenno pagbanagan dagiti hearing.
₱800 a nayon iti binulan a sueldo dagiti katulongan iti NCR, marugian inton Pebrero 7
Sinupiat ti Office of the Prosecutor ti kiddaw ni Kaufman a maitantan ti confirmation of charges hearing, ta saan nga umdas a pagibasaran ti bukod a paliiw ti depensa.
Nupay inaklonda a mabalin a maitantan ti panangbista, ania man a pannakaisardeng ket agpaay laeng iti panawen a kasapulan ti Pre-Trial Chamber I (PTC I) a mangtingiting iti kasasaad ni Duterte a makipaset iti pre-trial ken sumango iti panangbista.
Kinuestionar ti Prosecution no natarusan met laeng dagiti eksperto ti depensa ti pagalagadan ti ICC iti panangtingiting no kabaelan ti tao ti sumango iti panangbista, idinto a "nawada a pannakaawat" laeng ti kasapulan tapno makipaset ti akusado iti panagbista, a saan a ti pannakalagip iti amin a detalye ti pasamak.
Kinuna pay ti Prosecution a nangibaonda iti bukodda a medical expert a mangkita ken ni Duterte ken mangirekomendar kadagiti pamuspusan tapno makapagpartisipar ni Duterte.
Kadagiti kallabes, ibingbinglay ti depensa kadagiti media interview a nasayaat ti kasasaaad ti salun-at ni Duterte. (Argyll Cyrus Geducos/Manila Bulletin//Lito Hilidon/Bannawag)
