Mangipila iti mabiit ti Department of Justice (DOJ) kadagiti kaso a kriminal kontra kadagiti nairaman kadagiti “naanomalia” a flood control projects ta nangrugin nga isubmitir ti National Bureau of Investigation (NBI) dagiti natakuatanna.
Kinuna ni DOJ Sec. Jesus Crispin C. Remulla nga adalen ti DOJ no mabalin a maipila ti plunder kontra kadagiti responsable.
Ngem kinunana a sigurado a maipila ti kriminal a kaso gapu iti malversation ti public funds.
Saan nga impalgak ni Remulla dagiti inisial a natakuatan ti NBI nga immun-una a binilinna nga aramidenda ti bukodda a panagimbestigar.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Remulla, inrekomendarna iti Senado a saanda a palubosan ti pannakaited ti state's witness status kadagiti agassawa a kontraktor a da Cezarah “Sarah” Discaya ken Pacifico “Curlee” Discaya, a nangadmitir, bayat ti legislative hearing, iti pannakairamanda kadagiti anomalia.
Iti panangdakamatna kadagiti addan a linteg ken jurisprudence, inlawlawag ni Remulla a no kayat dagiti agassawa ti agbalin a saksi para iti estado, “rebbeng nga ibagada ti sibubukel a kinapudno, a saan a dagiti laeng pilpilienda a kayat nga ibaga.”
Kinuna pay ni Remulla nga adalen ti DOJ no asino kadagiti opisial ken empleado ti Department of Public Works and HIghways (DPWH) ti mabalin nga agsaksi para iti estado. (Jeffrey Damicog/MB)
