Pagduaduaan ni Senate President Pro Tempore Panfilo “Ping” Lacson ti kualipikasion da Cezarah "Sarah" ken Pacifico "Curlee" Discaya a kas state's witnesses gapu iti di panagtutunos ti testimoniada ken ti desisionda a mangibabawi iti testimoniada iti Kamara.
Iti naangay a Kapihan sa Senado forum idi Septiembre 11, nasaludsod ken ni Lacson no anamonganna ti panagkedked ni Senate President Vicente “Tito” Sotto III a mangpirma iti rekomendasion a maipasidong dagiti Discaya iti Witness Protection Program (WPP). Ngem kuna ni Lacson a saan a pinatgan ni Sekretario ti Department of Justice (DOJ) Jesus Crispin “Boying” Remulla ti kiddaw ni Sen. Rodante Marcoleta.
Segun ken ni Lacson, nagsaritaan da Sotto ken Remulla, isu a saanen a pinirmaan ti Senate President ti rekomendasion, innayon ni Lacson a restitution, wenno pannakaisubli dagiti naala a kuarta, ti maysa a kondision ni Remulla.
Inlawlawag ni Lacson a ti immuna a rekomendasion ket inaramid ti napalabas a daulo ti Blue Ribbon Committee, ket saanen a balido daytoy ta isu (Lacson), kas baro a daulo ti rumbeng a mang-validate ken mangpirma iti kastoy nga endorsement.
Kasapulan ti natibker ken nainkalintegan a pagtaktakderan iti parikut iti WPS --NMC
No maipapan iti kualipikasion dagiti Discaya a maipasidong iti WPP, kinuna ni Lacson a saanda a kualipikado gapu ta agbaliwbaliw ti testimoniada no addada iti Senado ken no addada iti Kamara.
Kinuna ni Lacson a rumbeng pay a masuot ti kredibilidad dagiti agassawa a Discaya babaen ti legislative immunity ken ti panagtutunos dagiti testimoniada.
Inlawlawag ni Lacson a rumbeng a maikkan nga umuna da Discaya iti legislative immunity tapno makitada ti kredibilidad dagiti agassawa, segun iti testimoniada.
Dinakamat ni Lacson dagiti kasapulan para iti pannakasalaknib dagiti state's witness, agraman ti kondision a saan nga isu ti kadakkelan iti basol (most guilty), ken ti kinadagsen ti testimoniada a patalgedan dagiti ebidensia.
Iti agdama, kinuna ni Lacson nga awan pay kadagiti nagtestigo ti nakitana a mabalin nga state's witness, ta ita pay laeng a mangisayangkat iti hearing kas daulo ti Blue Ribbon Committee. (Dhel Nazario/Manila Bulletin//Lito Hilidon/Bannawag)
