Mapan a ₱20.68 a milion ti nabusbos ti Office of the Vice President (OVP) para iti panagbiahe ni Bise Presidente Sara Duterte iti pagilian ken iti ballasiw-taaw manipud Enero agingga Hulio itoy a tawen, segun iti OVP, idi Septiembre 11.
Segun iti OVP Budget Division chief a ni Atty. Kelvin Gerome Tenido, ₱13.21 a milion ti nagasto ti bise presidente para iti panagbiahena iti pagilian, idinto a ₱7.47 a milion ti nabusbosna para kadagiti biahena iti ballasiw-taaw.
Ngem impaganetget ni Assistant Chief of Staff Lemuel Ortonio nga amin a ginasto ti bise presidente a nagbibiahe ket addaan iti travel authority ken saan a nagusar iti pondo ti gobierno.
Inlawlawag ni Tenido a ti nabusbos ni Duterte iti panagbiahena idi Hulio 2025 ket agpaay laeng kadagiti security personnel ni Duterte ta ibaklayna dagiti personal a magastona.
Senado, pinasingkedanna ti ₱6.793-trilion a nailian a badiet para 2026
Naipalgak daytoy a report sakbay a maidatag iti Kongreso ti singasing a badiet ti OVP para iti 2026 nga aggatad iti ₱902.895 a milion.
Iti sabali a bangir, kinuna ni Ortonio a sisasagana ti OVP a mangsungbat kadagiti amin a saludsod mainaig iti badiet kadagiti maangay a budget hearing iti Kongreso ita nga aldaw, Septiembre 12. (Raymund Antonio/Manila Bulletin//Lito Hilidon/Bannawag)
