Mangidatag ti Department of Justice (DOJ) iti motion for reconsideration a maibusor iti panangpalubos ti korte nga agpiansa ni dati a Negros Oriental 3rd District representative Arnolfo “Arnie” Teves Jr. iti maysa kadagiti kasona a pammapatay (murder).
Itay Septiembre 12, impaulog ni Judge Renato Enciso ti Manila Regional Trial Court (RTC) Branch 12 ti pammilin a nangipalubos nga agpiansa ni Teves.
Iti statement ti DOJ idi Septiembre 12, kunada a nadagsen unay ti kaso ni Teves a kinaranggas ken terorismo, a ti temporario a pannakawayawayana ket pangta iti talged ti publiko.
Kinuna ni DOJ a nainget ti panangsupiat dagiti prosecutor iti pangngeddeng ti Manila RTC.
Senado, pinasingkedanna ti ₱6.793-trilion a nailian a badiet para 2026
Innayon ti DOJ a ti pangngeddeng iti korte iti maysa a kaso, dina apektaran ti kinadagsen ken kinatibker dagiti ebidensia kontra ken ni Teves.
Naidarum pay ni Teves iti sangapulo a kaso ti pammapatay (murder), 13 a kaso ti frustrated murder, ken uppat a kaso ti attempted murder iti Manila RTC Branch 51 mainaig iti pangatakar dagiti mapapati a tao ni Teves iti pagtaengan ni Gobernador ti Negros Oriental Roel Degamo iti ili ti Pamplona idi Marso 2023 a nakapapatayan ni Degamo ken dadduma pay a tattao.
Nakasuan pay ni Teves iti murder iti pannakapapatay ni Michael Dungog a provincial board member ti Negros Oriental, ken ni Pacito Libron a mapaipagarup a maysa a hitman.
Impaganetget ti DOJ nga agtalinaedda a mangtungpal iti annongenda a mangusar kadagiti amin a legal a pamuspusan a mangsupiat iti di nainkalintegan a panagkiddaw iti piansa, ken masigurado a madusa ti nakabasol. (Jeffrey Damicog/Manila Bulletin//Lito Hilidon/Bannawag)
