Dinutokan ni Presidente Ferdinand R. Marcos Jr. ni retirado a Supreme Court (SC) Justice a ni Andres Reyes Jr. kas daulo ti nabuangay nga Independent Commission for Infrastructure (ICI), ita nga aldaw, Septiembre 15, a mangimbestigar iti mapapati nga anomalia dagiti flood control project.
Segun ken ni Marcos, ti saad ni Reyes a kas hues ti nagibasaranna a nangdutok ken ni Reyes a mangidaulo iti imbestigasion.
Nagpaay ni Reyes a kas trial judge manipud iti 1987 agingga 1999 a pannakadutokna met a kas Associate Justice ti Court of Appeals (CA).
Nadutokan ni Reyes a kas Presiding Justice ti CA idi 2010, ken kas Associate Justice ti SC idi 2017.
Mapukpukaw a nobia, nasarakan iti Pangasinan
Kadua ni Reyes kas kameng ti ICI da dati a Department of Public Works and Highways (DPWH) Secretary Rogelio Singson ken SGV & Co. executive Rossana Fajardo, a dinutokanen ni Marcos idi Septiembre 13.
Agpaay met ni Mayor ti Baguio City Benjamin Magalong a kas consultant, gapu iti padasna kas imbestigador ken iti naitulongna kadagiti panagimbestigar.
Impaganetget ni Marcos nga agtrabaho ti ICI nga agwaywayas ket saan nga agpannuray iti Malakanyang, ket namnamaenna a mangidatag ti ICI iti natakuatanda iti kabiitan a panawen tapno maiwanwan dagiti reporma a maipatungpal iti panaggasto ti gobierno kadagiti para iti publiko nga impraestruktura. (Darryl John Esguerra/PNA//Lito Hilidon/Bannawag)
