Imparangarang ti daulo ti Committee on Labor and Employment ti Kamara a ni Cavite 1st district Rep. Jolo Revilla nga iti laksid ti nababbaba a sueldo, dakdakkel ti gastos iti panagbiag kadagiti lugar iti ruar ti Metro Manila.
Segun ken ni Revilla, nupay ipampannakkel ti National Capital Region (NCR) a daytoy ti addaan iti kangatuan a minimum wage iti pagilian, nangatngato ti poverty threshold kadagiti kabangibangna a probinsia kas iti Bulacan, Cavite, Laguna, ken Rizal, a mangipakita a nanginngina ti kangrunaan a kasapulan ti biag iti ruar ti kabesera.
Kaipanananna, ad-adda a marigrigatan dagiti mangmangged iti ruar ti Metro Manila.
Maibasar iti datos ti Philippine Statistics Authority (PSA), ti annual per capita poverty threshold (wenno ti kababaan a gatad a kasapulan ti maysa a tao iti las-ud ti makatawen tapno kabaelanna a gatangen dagiti kangrunaan a masapulna) iti Metro Manila ket ₱37,711 idi 2023, idinto a nadanon ti Bulacan ti ₱39,202, ti Cavite ket ₱39,165, ti Laguna ket ₱38,492, ken ₱39,055 iti Rizal.
Senado, pinasingkedanna ti ₱6.793-trilion a nailian a badiet para 2026
Kaipapananna a ti binulan a pagrukodan ti panagbiag para iti maysa pamilia nga addaan iti uppat a kameng ket manipud iti ₱12,831 aginggana iti ₱13,131 -- nangatngato ngem iti ₱12,570.31 iti NCR.
Tinaming ti komite dagiti kasapulan unay a pamuspusan tapno mapasayaat ti panagpapada iti sueldo ken pannakagun-od iti trabaho. Maysa ditoy ti House Resolution (HR) No. 232 -- a binukel ni Revilla -- a mangdagadag iti Regional Tripartite Wages and Productivity Board (RTWPB) nga agtignay kadagiti nakapila a petision iti pannakaingato iti sueldo iti tunggal rehion.
Impaganetget ni Revilla ti kinaubbaw iti agdama a sistema a dagiti agtrabtrabaho wenno agindeg iti mano laengen a metro ti kaadayona iti Kamanilaan ket nagdakkelen ti nagdumaan ti sueldoda ta sabalin ti nakaipananda nga administrative region.
Kinuna ni Revilla a patalgedan ti datos ti PSA ti rkna dagiti adu a mangmangged: a ti minimum wage iti probinsiada ket saan a maitutop iti pudpudno a kasapulan tapno agbiag.
Innayon ni Revilla a saan laeng a ti pannakaipangato iti sueldo ti tarigagayanda, no di ket ti pannakaatur iti saan a nainkalintegan a panangtrato kadagiti mangmangged. (Ellson Quismorio/Manila Bulletin//Lito Hilidon/Bannawag)
