Nagyaman ni Gabriela Party-list nominee Sarah Elago kadagiti mangsupsuportar iti grupo gapu iti panagtalekda iti Gabriela kalpasan ti damo a resulta ti 2025 mid-term polls, a saan a naigasatan ti party-list ti nairaman kadagiti nangabak.
Ngem segun iti Commission on Elections (Comelec), idi Domingo, Sept. 14, maiproklamarto ti Gabriela a kas maika-64 a nangabak a party-list, a pakaipaayan ken ni Elago iti tugaw iti Kamara dagiti Pannakabagi, iti maika-20 a Kongreso.
"Naimpusuan a panagyamanmi iti amin a nagtalek ken iti awan sardayna a panangiganetget dagiti babbai, LGBTQIA+, agtutubo, ken nadumaduma a mangsupsuportar tapno maiproklamar ti Gabriela Women’s Party kas pudpudno, mannakirupir, ken para iti ili a Mangibagi kadagiti Babbai iti Kongreso," kinunana iti maysa nga statement.
Iti manamnama a pannakastrek ni Elago iti Kamara, makagun-od iti maikatlo a tugaw ti militante a Makabayan bloc iti 300-kameng a Kamara.
Senado, pinasingkedanna ti ₱6.793-trilion a nailian a badiet para 2026
Immuna a nakastrek kas kongresista da dagiti Act Teachers Party-List Rep. Antonio Tinio ken Kabataan Party-List Rep. Renee Co.
Binabalaw met ni Elago, a nagpaayen a kas kongresista a nangibagi idi iti Kabataan Party-list, ti napnuan biddut a sistema ti party-list gapu iti pannakapaidam ti lehislatura kadagiti pudpudno a mangibagi kadagiti mailanglangi a sektor.
"Gapu iti rinuker a sistema ken panagraira dagiti peke a party-list a mangus-usar laeng iti puesto para kadagiti bukbukodda a pagimbagan, nakarikrikut ti pannakilaban para kadagiti pudpudno a mailanglangi a timek ti umili--ngem saan a naupay dagiti babbai uray pay maipilpilit a mapengdan ti bosesda iti Kongreso," kinunana.
Inkari ni Elago nga ilabanna dadagiti kalintegan dagiti babbai iti nadumaduma a tukad ti kagimongan. (Ellson Quismorio/MANILA BULLETIN)
