Inarestar ti Fertilizer and Pesticide Authority (FPA), Criminal Investigation and Detection Group (CIDG), ken ti Aritao Municipal Police ti tallo a tattao gapu iti panaglakoda kadagiti saan a rehistrado nga abono ken agricultural growth hormones iti Aritao, Nueva Vizcaya.
Naisayangkat ti operasion idi Septiembre 13 iti Aritao, kalpasan a nakaawat dagiti autoridad iti report iti illegal a panaglako kadagiti produkto ti agrikultura a saan nga autorisado ti FPA. Nakompiskar dagiti autoridad ti umabot iti ₱475,000 a balorna a di rehistrado nga abono ken growth enhancers.
Nakemmeg da Jemuel, 34; Aiza, 36; ken Fernando, 45, a bin-ig a residente iti Guimba, Nueva Ecija.
Impaganetget ni FPA Executive Director Glenn Estrada ti kinapateg ti operasion. “Saan a registrado iti FPA dagiti produkto a nakompiskar dagiti operatiba ti polisia isu a saan nga autorisado a maiwaras. Nadokumentaran ti operasion babaen ti dua nga alternative recording devices ken nasaksian ti dua nga opisial ti barangay,” kinuna ni Estrada.
Farm specialist iti Abra, napaltogan
Mairaman kadagiti nakompiskar ti 40 a botelia ti 250-mililitro a Morbunga vitamin fertilizer, 80 a botelia ti 250-mililitro a Kill, 24 a botelia ti 500-mililitro a Berde Super Growth Hormones, ken 80 a botelia ti 250 mililitro a Long Death.
Dinayaw ni Agriculture Secretary Francisco P. Tiu Laurel Jr. ti pannakaiganetget a maipatungpal ti linteg ken impalagipna ti pangta nga itden dagiti unregulated a produkto.
“Dadaelen dagitoy a di rehistrado a produkto ti panagreggettayo a mangpasayaat iti produktibidad ti talon ken mabalin a mangpataud kadagiti risgo kadagiti apit, aglawlaw, ken salun-at ti publiko,” kinunana.
Naisayangkat ti operasion babaen ti panangidaulo da PCpl Elmer C. Dona-al, a nagserbi a kas investigating officer, ken PSsg Glenn B. Migano, arresting officer ken nagakem kas poseur buyer. (DA Press Office/DA–OSEC Comms)
