Agdagup iti ₱928.52 a bilion ti pondo a dawdawaten ti Department of Education (DepEd) iti singasing a nailian a badiet para iti 2026, a katukad ti uppat a porsiento ti gross domestic product (GDP) ti pagilian, a mausar para kadagiti maipatakder a siled-pagadalan, taraon, digital a panagadal, ken pagimbagan dagiti mannursuro.
Segun ken ni Sekretario ti DepEd Sonny Angara ita nga aldaw, Septiembre 16, addan iti panangtingiting ti Senado ti singasingda a badiet, a tunggal pisos ket mailatang para kadagiti adalan ken mannursuro.
"Dakkel ti karit a sangsanguen ti sektor ti edukasion, ngem nalawag ti turongen -- tunggal pondo ket maipaay kadagiti adalan ken mannursuro," kinuna ni Angara.
Mailatang ti ₱56.4 a bilion iti impraestruktura dagiti pagadalan, agraman ti pannakaipatakder ken pannakatarimaan dagiti siled-pagadalan, medium-rise building, pannakaikapet ti koriente kadagiti pagadalan, ken pannakaipasdek kadagiti library hub ken natibker a pasilidad.
Senado, pinasingkedanna ti ₱6.793-trilion a nailian a badiet para 2026
Maipan ti ₱50.6 a bilion iti nutrision, kadagiti School-Based Feeding Program, a buklen ti 25 a nayon a feeding days, a mangipaay iti taraon kadagiti malnourished nga ubbing, ken mangipaay iti feeding support kadagiti agtutubo nga inna.
Tapno mapunnuan ti giwang ti digital a koneksion, mailatang ti ₱16 a bilion para iti 243,000 a laptop ken koneksion iti internet para kadagiti pagadalan a saan pay nga online.
Ti ₱6 a bilion ti agpaay iti panagdur-as iti kabaelan dagiti mannursuro para iti panagrang-ay ti karera dagiti 113,000 a mannursuro ken daulo ti pagadalan.
Segun ken ni Angara, ti edukasion ket saan a malpas iti maysa a siklo ti badiet wenno maysa a tawen, no di ket agtultuloy a pannakibakal nga agkasapulan iti natibker a suporta. (Wilnard Bacelonia/PNA//Lito Hilidon//Bannawag)
