Namakdaar ti Philippine Atmospheric, Geophysical and Astronomical Services Administration (PAGASA) idi Lunes, Septiembre 15, a mabalin a mabukel ti La Niña inton Oktubre, a mangyeg iti napigpigsa a tudo, ad-adu a bagyo, ken napegpeggad a panaglayus ken panagreggaay kadagiti lugar a nalaka a maapektaran.
Segun iti PAGASA, adda 70 a porsiento ti posibilidad a mabukel ti La Niña manipud Oktubre agingga iti Disiembre ti 2025 ken mabalin nga agpaut manipud Disiembre 2025 agingga iti Pebrero 2026.
Ti La Niña ket nailasin babaen ti nangatngato ngem iti gagangay a bilang dagiti tropikal a bagyo a sumrek iti pagilian iti ngudo ti tawen; idinto a kadagiti nabiit pay a pakpakauna ket mangipakita iti nangatngato a posibilidad ti nangatngato ngem iti normal a kasasaad ti tudo iti kaaduan a paset ti pagilian.
Dagitoy a tudo ket mabalin a parnuayen ti abagat (monsoon), severe thunderstorms, low pressure areas (LPA), easterlies, shearline, ken intertropical convergence zone (ITCZ), a mabalin a mangdateng iti pannakadadael, agraman panaglayus ken panagreggaay kadagiti lugar a nalaka a maapektaran.
DOH, namakdaar iti posible a pannakadangran iti Traslacion
Agtultuloy ti panangmonitor ti PAGASA iti posibilidad ti La Niña ken ti epekto daytoy iti lokal a klima, ken dinagadagda ti amin a maseknan nga ahensia ti gobierno nga agridamda a kankanayon ken saganaanda ti mabalin nga epekto ti La Niña. (Jel Santos/Manila Bulletin//Lito Hilidon/Bannawag)
