Kinissayan ti Department of Public Works and Highways (DPWH) ti singasingda a badiet para iti 2026, a nagbalinen a nasurok a ₱625 a bilion ti gatadna, kalpasan a matakuatan dagiti mapagduaduaan a nailatang a pondo.
Segun ken ni Sekretario ti DPWH Vivencio Dizon, nasurok a ₱881 a bilion ti orihinal nga indatagda a badiet para iti 2026 ngem kinissayanda daytoy tapno tamingenda dagiti parikut a nadakamat iti immuna a singasingda.
Nasurok a ₱255 a bilion ti naksay iti badiet, ket nagbalin laengen a ₱625 a bilion daytoy.
Kinuna ni Dizon a nayawaten ti narebisar a singasing a badiet ken ni House Speaker Martin Romualdez babaen ti daulo ti Appropriations Committee a ni Rep. Mikaela Angela Suansing sakbay ti naituding a deliberasion ti Kamara.
Mapukpukaw a nobia, nasarakan iti Pangasinan
Kinuna ni Dizon a naikkaten iti singasing a badiet ti ₱252 a bilion a balor dagiti flood control project a pinonduan ti lokal, kas imbilin ni Presidente Marcos.
Ti saan a nagasto ket naisingasing a mayakar iti sektor ti agrikultura, edukasion, pannakatagiben ti salun-at, pabalay, trabaho, social welfare, ken information technology tapno masuportaran dagiti maipangpangruna a sektor.
Inggunamgunam ni Dizon nga inaramidna ti amin tapno ti narebisar a singasingda a badiet ket mangipakita iti natakneng a pannakausar iti pondo ti gobierno ken itandudona daytoy iti House Committee on Appropriations ita nga aldaw, Septiembre 17. (Trixee Rosel/Manila Bulletin//Lito Hilidon/Bannawag)
