Agtultuloy latta ti panagtignay ni Bagyo Mirasol iti Northern Luzon, nga addan ti sentrona iti probinsia ti Ifugao ita nga aldaw, Septiembre 17, segun iti Philippine Atmospheric, Geophysical and Astronomical Services Administration (PAGASA).
Maibasar iti kaudian a padamag ti PAGASA, nasaripatpatanda ti sentro ni Mirasol itay 10:00 ti bigat iti Alfonso Lista, Ifugao, ket addaan iti kapigsa a 55 a kilometro kada oras, ken pugso a 90 a kilometro kada oras, nga agpaamianan a laud iti kapardas a 15 a kilometro kada oras.
Imbayog ti PAGASA ti Tropical Cyclone Wind Signal (TCWS) No. 1 kadagiti sumagmamano a lugar iti Northern ken Central Luzon gapu iti pangta ti napigsa nga angin.
Naipan iti TCWS No. 1 ti Batanes, Cagayan agraman Babuyan Islands, Isabela, Quirino, Nueva Vizcaya, ti amianan ken sentro a paset ti Aurora (Dilasag, Casiguran, Dinalungan, Dipaculao, Baler, Maria Aurora), Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, ti amianan a daya a paset ti Pangasinan (San Nicolas, Natividad, San Manuel, Sison, San Quintin, Tayug), ken ti amianan a paset ti Nueva Ecija (Carranglan, Pantabangan).
DOH, namakdaar iti posible a pannakadangran iti Traslacion
Maekspektar a lasaten ni Mirasol ti Northern Luzon ita nga aldaw ken rummuar iti Luzon Strait itoy a rabii. Posible a pumigsa pay ni Mirasol no agsubli daytoy iti baybay ken manamnama a rumuaren iti Philippine Area of Responsibility (PAR) inton Huebes, Septiembre 18. (Merlina Hernando-Malipot/Manila Bulletin//Lito Hilidon/Bannawag)
