Inwayat ti Anti-Money Laundering Council (AMLC) ti freeze order wenno pammilin a pannakatengngel para iti nasurok a 130 a bank accounts ken insurance policies a nainaig iti eskandalo ti panagkunniber a kadagiti proyekto a pangkontrol iti layus, segun iti waragawag dagiti autoridad idi Martes, Septiembre 16.
Pinatgan ti Court of Appeals ti pammilin para iti 135 a bank account ken 27 nga insurance policies a kukua ti 26 nga indibidual, agraman dagiti personnel ti Department of Public Works and Highways (DPWH), kontraktor, ken dagiti kompaniada.
Kinuna ni DPWH Secretary Vivencio Dizon iti maysa a briefing a mairaman kadagiti account dagiti “Bulacan Group of Contractors” wenno “BGC Boys” ken dadduma pay a kontraktor ti DPWH a kas ken ni Sarah Discaya.
Naipaulog ti freeze order, nga epektibo a dagus, babaen ti Anti-Money Laundering Act. Dinakamat ti AMLC ti potensial a money laundering ti pondo ti publiko a nairanta para kadagiti proyekto. Bayat a saan pay a naikeddeng ti dagup a gatad a nai-freeze wenno natengngel, kinuna ti AMLC a namnamaenda a maammuan ti gatad iti uneg ti 24 nga oras.
Mapukpukaw a nobia, nasarakan iti Pangasinan
Napasamak ti pannakatengngel dagiti account kalpasan ti panagsurat idi Septiembre 12 ni Dizon ken ni AMLC Executive Director Matthew M. David a nangkiddaw iti freeze order para kadagiti sanikua ti 23 nga opisial ti DPWH ken tallo a pribado a kontraktor. Dagiti opisial nga adda iti listaan ket pakairamanan ti dati nga assistat regional director, tallo a dati wenno agdama a district engineer, ken nadumaduma a section chiefs ken engineers.
Nabigbig dagiti pribado a kontraktor a da Ma. Da Roma Angeline D. Rimando ken Cezarah Rowena C. Discaya ti St. Timothy Construction Corp., Mark Allan V. Arevalo ti Wawao Builders, Sally N. Servino ti SYMS Construction Trading, ken Robert T. Imperio ti RJ Construction Corp.
Iti suratna, dineskribir ni Dizon ti kiddaw a kas “extraordinary and interim legal remedy tapno malapdan ti pannakaiwaras, pannakaikkat, wenno pannakaidulin dagiti sanikua a mapapati unay a nagtaud iti naganar, wenno mainaig, iti saan a nainlintegan nga aktibidad.”
Kas pangsuportar iti kiddaw, nangipakuyog ti DPWH iti reklamo a naipila iti Office of the Ombudsman, kasta met ti special audit report manipud iti DPWH Internal Audit Service a napetsaan iti Agosto 25, 2025, ken team audit report manipud iti Commission on Audit a napetsaan iti Septiembre 8, 2025.
Ingganetget ti departamento a mangipaay dagitoy a report iti “napigsa nga ebidensia a manginaig kadagiti sanikua dagiti nadakamat nga indibidual ken entidad kadagiti mapapati a di nainlintegan nga aktibidad.” (Derco Rosal/MANILA BULLETIN)
