Inkeddeng ti Commission on Elections (Comelec) ita nga aldaw, Septiembre 17, nga isardengda pay laeng ti pangsaganada para iti eleksion iti Bangsamoro Autonomous Region for Muslim Mindanao (BARMM) a naikeddeng a maangay inton Oktubre 13, 2025.
Segun iti resolusion nga impaulog ni Chairman ti Comelec George Erwin Garcia, isardengda ti panagsagana agingga nga ikkaten ti Korte Suprema (SC) ti Temporary Restraining Order (TRO) wenno agingga a di marisut ti kinabalido ti Bangsamoro Autonomy Act (BAA) 77.
Binaliwan nga inurnos ti BAA 77 dagiti parliamentary district iti Bangsamoro Autonomous Region for Muslim Mindanao (BARMM) tapno maiwaras dagiti pito a pagsaadan a nailatang koma iti probinsia ti Sulu.
Nabayagen nga indeklarar ti SC a saan a maitunos iti linteg ti pannakairaman ti probinsia ti Sulu iti Bangsamoro Autonomous Region.
Mapukpukaw a nobia, nasarakan iti Pangasinan
Nangipaulog ti SC iti TRO a manglapped iti pannakayimplementar ti BAA 77.
Binilin ti SC ti Law Department a makikoordinar iti Office of the Solicitor General para iti panangipila ti Comelec iti Extremely Urgent Manifestation in Compliance to the Temporary Restraining Order a naipaulog idi Septiembre 15.
Babaen daytoy a manifestation, kinuna ni Garcia a mabalin a lawlawagen ti SC no ania ti rumbeng nga aramiden ti Comelec. (Dhel Nazario/Manila Bulletin//Lito Hilidon/Bannawag)
