Kinondenar ti Estados Unidos (US) itay Septiembre 16 ti kaudian nga insidente ti panangipaturong ti China iti water cannon iti bapor ti Bureau of Fisheries and Aquatic Resources (BFAR) iti Bajo de Masinloc (Scarborough Shoal) a nakadangran ti maysa a Filipino.
"Kondenaren ti US ti naranggas nga aramid ti China iti EEZ (exclusive economic zone) iti asideg ti Scarborough Reef. Dayawenmi ti gobierno ti Filipinas ken ti Philippine Coast Guard gapu iti propesional a panangsalimetmetda iti kalinteganda, panangsalaknib kadagiti mangngalap, ken panangraem iti linteg ti baybay para iti siwawaya ken silulukat para iti amin nga Indo-Pacific," kuna ni US Ambassador to the Philippines MaryKay Carlson.
Pinaturongan ti China iti water cannon ti BRP Datu Gumbay Piang nga adda iti agarup 14 a nautical miles iti daya ti Bajo de Masinloc iti las-ud ti di nababbaba ngem iti 29 a minuto, a nakabuongan ti sarming a tawada ken nangdadael iti nadumaduma a paset ti bapor.
Kinompirmar ti PCG nga adda maysa nga empleado ti BFAR a nadangran iti kanigid a lapayagna gapu iti nabuong a sarming.
Mapukpukaw a nobia, nasarakan iti Pangasinan
Sakbay daytoy, kinuna ti PCG nga inyanunsio ti maysa a warship ti Chinese People’s Liberation Army-Navy nga addaan iti bow number 525, babaen ti radio broadcast ti “live fire exercises” iti natudingan a coordinates -- a nangpataud iti panaglagaw ken panagamak dagiti Filipino a mangngalap sadiay. (Joyce Ann L. Rocamora/PNA//Lito Hilidon/Bannawag)
