Naipakat ti cite in contempt kada contractor a Pacifico "Curlee" Discaya ken dati a daulo ti Bulacan First District Engineering Office Henry Alcantara gapu iti mapapati a panagulbodda iti naangay a hearing ti Senate Blue Ribbon Committee ita nga aldaw, Septiembre 18, mainaig kadagiti naanomalia a flood control project iti pagilian.
Immuna a na-cite in contempt ni Discaya gapu iti panagduduma ti ibagbagana maipapan iti saan nga idadar-ay ti asawana a ni Cezarah "Sarah" Discaya iti hearing. Kuna ni Curlee a saan a nakadar-ay ni Sarah gapu iti sakit ti pusona.
Ngem sabali ti nailanad iti excuse letter nga impatulod ni Sarah iti komite, a binasa ni Senate President Pro Tempore Panfilo "Ping" Lacson, ta kinuna ni Sarah nga adda nasken a meeting-na kadagiti empleadoda isu a saan a makadar-ay iti hearing iti Senado.
Daytoy ti nanggubuay iti panagluksaw ni Senador Erwin Tulfo, a nangbabalaw ken Curlee nga ul-ulbodenna ida a rupanrupa -- ket ibilangna daytoy a pananglais kadagiti senador, isu a nagmosion a ma-cite in contempt ni Curlee.
Mapukpukaw a nobia, nasarakan iti Pangasinan
Iti sabali a bangir, na-cite in contempt met ni Alcantara gapu met laeng iti panagulbod, ta iliblibakna nga adda pakainaiganna kadagiti naanomalia a flood control project iti Bulacan, ket kinunana nga agpirma laeng iti dokumento ti trabahona.
Segun ken ni Tulfo, maikadua a darasen nga agul-ulbod ni Alcantara, ta pagparparangenna a dagiti laeng taona ti nakabasol, malaksid kenkuana.
Ngem impetteng latta ni Alcantara nga awan ti ammona kadagiti ghost project.
Saan a napnek ni Tulfo iti palawag ni Alcantara, isu nga immosionna a ma-cite in contempt daytoy.
Naipan da Curlee ken Alcantara iti kustodia ti Office of the Sergeant-At-Arms of the Senate (OSAA) kas immosion ni Tulfo. (Dhel Nazario/Manila Bulletin//Lito Hilidon/Bannawag)
