Impaulog ti Blue Ribbon Committee ti Senado ita nga aldaw, Septiembre 18, ti subpoena kontra ken ni dati nga undersecretary ti Department of Public Works and Highways (DPWH) Catalina Cabral, gapu iti dina latta idadar-ay iti maar-aramid a panagimbestigar kadagiti naanomalia a flood control project.
Ni Senador Rodante Marcoleta ti nangdillaw no apay nga awan ni Cabral iti hearing.
Impakaammo ni Sekretario ti DPWH Vivencio Dizon iti komite nga inwatnan ti courtesy resignation nga inted kenkuana ni Cabral, ngem impasiguradona a mabalin latta nga awisenda ni Cabral, saan a kas maysa nga opisial ti ahensia, no di ket kas pribado nga umili.
Inlawlawag ni Marcoleta a saan a maliklikan ni Cabral ti karbenganna gapu laeng iti panaglusulosna a kas opisial ti DPWH.
Marcos, Robredo, nagsarak iti Naga city
Iti privilege speech ni Sen. Panfilo “Ping” Lacson, dinakamatna ni Cabral a kas maysa kadagiti nag-text ken ni Senate President Vicente Sotto III a nagsaludsod kenkuana no ania ti kayatna nga isingit iti 2026 National Expenditure Program (NEP) kalpasan a nangabak daytoy a kas senador.
Gapu itoy, immosion ni Marcoleta a maikkan iti subpoena ni Cabral, a sinegundaran ni Sen. Erwin Tulfo. Inaprobaran ni Lacson ti mosion ni Marcoleta gapu ta awan ti nangsupiat iti daytoy.
Iti hearing nga inangay ti Committee on Public Works and Highways iti Kamara, kinompirmar pay ni Cabral nga adda infrastructure project a naipaay iti 1st District of Davao City nga agdagup iti ₱51 a bilion iti maudi a tallo a tawen ti termino ni dati a presidente Rodigo Duterte. (Hannah L. Torregoza/Manila Bulletin//Lito Hilidon/Bannawag)
