Mabalin a pumigsa ni Tropical Depression “Nando” ken agbalin a naan-anay a bagyo, ken super typhoon, segun iti Philippine Atmospheric, Geophysical, and Astronomical Services Administration (PAGASA) ita nga aldaw, Septiembre 18.
Nupay saan a direkta nga apektaran ni Nando ti panawen iti las-ud ti 48 nga oras, kuna ti PAGASA a mabalin a pumigsa ti tudo ti abagat (southwest monsoon) iti nadumaduma a paset ti pagilian iti ngudo ti lawas.
Iti waragawag ti PAGASA itay 5:00 ti agsapa, agtultuloy nga agtignay ni Nando nga agpaamianan- amianan a laud ti Philippine Sea, ken agpigsa iti 55 a kilometro kada oras, ken addaan pugso nga agingga iti 70 a kilometro kada oras.
Segun iti PAGASA, mabalin a pumigsa pay ni Nando a kas bagyo inton Septiembre 20, ken posible nga agbalin a super typhoon, ket apektaranna ti Northern Luzon inton Septiembre 21. (Merlina Hernando-Malipot/Manila Bulletin//Lito Hilidon/Bannawag)
